“රනිල් මහත්තයාට මේ ආර්ථික ප්‍රශ්නය විසඳන්න පුළුවන්” කියලා සමහරු කියනවා. ඒත් මට නම් ඒ ගැන විශ්වාසයක් නෑ.
ආණ්ඩුව මැදිහත් වෙලා කරන ආර්ථික කළමනාකරණයේ වැරැද්ද රනිල් මහත්තයා දන්නවා. ඒත් කර උඩ තියාගෙන ඉන්න මහා බර ආණ්ඩුව විසින් පවරන්න ඕන කාට ද, කොහොම ද කියලා රනිල් මහත්තයා දන්නේ නෑ.

ශ්‍රී ලංකන් ගුවන් සේවය කාට හරි පවරන එක නම් ඒ මහත්තයා ඉක්මනින් කරයි. එහෙම වැඩකට මහා සමාජ විරෝධයක් එල්ලවෙන්නේ නෑ. ඒත් ඒක එක පුංචි පියවරක් විතරයි. උඩ තලයේ කරන මේ වැඩ තාවකාලිකයි.

දැන් තියෙන්නේ ආධාර ඇරගෙන විසඳන්න පුළුවන් ප්‍රශ්නයක් නෙවෙයි. සුනාමියක්, ගංවතුරක් ඇතිවෙච්ච වෙලාවට නම් ආධාර ප්‍රයෝජනවත්. ඒත් දැන් තියෙන්නේ එහෙම ප්‍රශ්නයක් නෙවෙයි. “අපේ වාහනවලට තෙල් ගහන්න අපිට ආධාර කරන්න” කියලා කියන්න පුළුවන් ද? ඉතින් මේ ආධාර හීනය හරි යන වැඩක් නෙවෙයි.

⁣ආර්ථික ප්‍රතිසංස්කරණ පටන්ගන්න ඕන බිම ඉඳලා. එහෙම දෙයක් ගැන රනිල් මහත්තයා දන්නේ නෑ. දැනගත්තත් එහෙම වැඩපිළිවෙළක් ක්‍රියාත්මක කරන්න රනිල් මහත්තයාට බෑ.
තව සතියක් ඇතුළත මිනිස්සු කලබල කරන්නේ කන්න නැතුව. මෙහෙම වෙන්නේ රටේ කෑම නැති හින්දා නෙවෙයි. ඩීසල් නැති හින්දා. තියෙන කෑම ප්‍රවාහනය කරන්න බැරිවෙන හින්දා.
අපේ මිනිස්සුන්ට බඩගින්නේ ඉඳලා පුරුදු නෑ. අම්මා මුත්තා කාලෙවත් එහෙම අත්දැකීමක් ලැබිලා නෑ. ඉතින් ඇතිවෙන කලබලය මහ විනාශකාරී එකක් වෙන්නත් ඉඩ තියෙනවා.
මේ ගැන හිතන පාටක් පේන්නත් නෑ. මට නම් හරි ම බයයි. ඒ වගේ ම, දුකයි.

ආචාර්ය වරුණ චන්ද්‍රකීර්ති