ලොව මෙතෙක් බිහිවු විශිෂ්ටතම පාපන්දු ක්‍රීඩකයා ලෙස සැළකෙන බ්‍රසීල පාපන්දු ක්‍රීඩක ‘එඩ්ස්ටන් නස්ටිමෙන්ටෝ‘ හෙවත් ‘පේලේ‘ මිය ගිය බව වාර්තා වේ.

82 හැවිරිදි වියෙහි පසුවු පේලේ, බ්‍රසීල රෝහලක ප්‍රතිකාර ලබමින් සිටියදී මෙසේ මියගොස් ඇති බව සදහන් ය.

වකුගඩු ආශ්‍රිත රෝගී තත්ත්වයක් හේතුවෙන් ඔහු මෙම රෝහලේ ප්‍රතිකාර ලබමින් සිටි බවයි විදෙස් මාධ්‍ය වාර්තා කරන්නේ.

15 හැවිරිදි වියේ දී බ්‍රසීල ජාතික පාපන්දු කණ්ඩායම නියෝජනය කරමින් පේලේ ජාත්‍යන්තර තරග බිමට අවතීරණ වූ අතර, ඉන්පසුව ඔහුගේ මුල් නම වූ එඩ්ස්ටන් නස්ටිමෙන්ටෝ වෙනුවට ඔහු ලොව ප්‍රකට වුයේ පේ‍ලේ නම් අන්වර්ථ නාමයෙනි.

1958, 1962 සහ 1970 දී යන වර්ෂවලදී තෙවරක් පාපන්දු ලෝක ශුරතාව බ්‍රසීලයට දිනාදීමට දායකත්වය දැක්වු පේලේ 2000 වර්ෂයේ දී සියවසේ පාපන්දු ක්‍රීඩකයා ලෙස නම් කර තිබුණි.

ඊට අමතරව ඔහු බ්‍රසීලය වෙනුවෙන් තරග 92කදී ගෝල 77ක් ඇතුළුව වසර 21ක වෘත්තීය ක්‍රීඩා ජීවිතය තුළ තරග 1,363කදී ගෝල 1,281ක් රැස්කරමින් ලෝක වාර්තාවක් තබා තිබේ.