සිරිමා නිකොල් වීරතුංග ඉපදෙන්නේ 1964 වසරේ ආදරවන්තයන්ගේ දිනයේ දීය. එනම් පෙබරවාරි දාහතර වැනිදායකය. ප්‍රංශ ජාතික මවකට (ඊඩිත්) ශ්‍රී ලාංකිකයෙකුට දාව (චාල්ස් රන්ජිත්) උපන් ඇයගේ ළමා කාලය යම්තාක් දුරකට කටුක එකක් විය. දෙමව්පියන්ගේ විවාහය බිඳ වැටීමත් සමඟ ඇගේ පියා ඇයව ලංකාවට ගෙන ආවේය. කුඩා කාලය පුරා පියාගේ සෙනෙහස නොඅඩුව ඇයට ලැබුණි. සංගීතයට අතිශයින් ලැදිකමක් දැක්වූ ඇගේ පියාගේ පවුලේ සාමාජිකයන් ගිටාරය වයමින් ගැයූ ගීත කුඩා ඇයව වශී කිරීමට සමත් විය. බාල වියේ දී පටන් ඇය මෙසේ සංගීතය කෙරෙහි ආකර්ශනය වූවාය. එසේම ප්‍රංශ සහ ඉංග්‍රීසි භාෂා මව්භාෂා කරගනිමින් සිටි ඇයට සිය පිය පාර්ශ්වයේ ඥාතීන් භාවිතා කරන සිංහල තරමක් දුරට අසීරු විය. මේ නිසා විශ්ව භාෂාව වන සංගීතයට ඇය ඇලුම් කිරීම ස්වභාවික විය.

යළිත් වරක් සිය මවගේ බලපෑම මත එංගලන්තය බලා ගිය සිරිමා සිය මව සමග වෙසෙමින් සිය අධ්‍යාපන කටයුතු සම්පූර්ණ කළාය.නමුත් ඇයට මව සමග සමග ජීවිතය රුචිකර නොවීය.බොහෝවිට ඇයට තම පියාව මතක් වන්නට ඇත. පසු කලෙක දී ඇය තම පියා සිහිකරමින් ගීයක්ද ගැයුවාය.එහිදී ඔහුගේ උණුසුම නොමැතිව තමන් කෙතරම් දුකින් සිටියේද යන්න පිළිබඳ සිය රසිකයන් සමඟ බෙදා ගත්තාය.

වැඩිවියට පැමිණීමත් සමගම එකල යුරෝපයේ දරුවන් අතර ජනප්‍රියව තිබූ සාමාන්‍ය සම්ප්‍රදායක් වූ නිවසෙන් බැහැරව ගොස් ස්වාධීන වීමට ඇය තීරණය කළාය.ඒ අනුව දහ අටවන වියට පැමිණීමත් සමගම සිය මවට සහ එංගලන්තයට සමුදි ප්‍රංශය වෙත ගියේ නැවුම් බලාපොරොත්තු රැසක් පොදි බැඳ ගනිමිනි.
කෙසේ වෙතත් තම සිතු මනාපයේ පැරීසිය වෙත පැමිණියත් ඇයට මුදල් ඉපයීමේ මගක් නොවීය.තමන් සතුව පැවති ගිටාරය වයමින් ගී ගයා මුදල් ඉපයීමට ඇය තීරණය කළේ ඉන් පසුවය.පසුව චැටේලට් ලෙස් හලේස් (Chatelet Les Halles) ඕමාන් දුම්රියපළ ඇයගේ නිත්‍ය රැකියා ස්ථානය බවට පත්විය. විවිධ කාර්යබහුල කම් මධ්‍යයේ වුවද ඇගේ මියුරු ගී හඬ රස විඳ ප්‍රංශ දුම්රිය මගින් ෆ්‍රැන්ක් කීපයකින් නොමසුරුව ඇයට ආධාර කළාය.

ආදරය යනු ප්‍රංශ සභ්‍යත්වයේම කොටසකි.අහම්බෙන් මෙන් ප්‍රංශයේදි කහට්ට්‍රා සසෝරිත් (Kahatra Sasorith) සංක්‍රමණික ගායක සංගීතඥයා ඇයට මුණ ගැසුණේය.සංගීතය තම ජීවිතය කරගත් ඔහුට ජාත්‍යන්තර මට්ටමේ සංගීතඥයෙකු වීම ආදි.බලාපොරොත්තු රැසක් විය. සංගීතය දෙදෙනාගේම ජීවිත තව තවත් සමීප කරන්නට සමත් විය.ඇත්ත වශයෙන්ම කියතොත් ඔහු ඇයගේ කට හඬට වශී විය. ඇයද අද ඇතැම් විට තමන්ට කුඩා කාලයේ අහිමි වුණු පිය සෙනෙහසට සමාන සෙනෙහසක් ඔහුගෙන් බලාපොරොත්තු වන්නට ඇත.

ඒ අනුව එක් ගමනක් යෑමට සැරසුණු ඔවුන් දෙදෙනාගේ කැදැල්ලට නමුත් කිම් නම් සුරතල් පුතෙක් ද එකතු විය. කිම් මව් කුසේ සිටි කාලය තුළදී පවා සිරිමා උමං දුම්රිය පොළේ ගී ගැයීමට ගියාය. ඒ ඔවුන් දෙදෙනාගේම ආර්ථික පිළිසරණ එය වූ බැවිනි.

මෙකල සිදු වූ හමුවීමක් ඇගේ ජීවිතය සම්පූර්ණයෙන්ම වෙනස් කිරීමට සමත් විය. ඒ පිලිපේ දෙලෙට්‍රෙස් (Philippe Delettrez) නම් එකල ප්‍රංශයේ ජනප්‍රිය සැක්සෆෝන් වාදක සංගීතඥයකු ඇගේ කටහඬේ ඇති සුවිශේෂීතාවය හඳුනාගැනීමයි.ඔහු මගින් රාත්‍රී සමාජශාලාවල ගී ගැයීමේ අවස්ථාවන් සඳහා දොරටු ඇයට විවෘත වූ අතර ඒ මගින් ඇගේ ජීවිතයේ ආර්ථික ප්‍රශ්න බොහෝ දුරට සමනය කරගැනීමට සමත් වූවාය.

මේ කාලයේ දී ප්‍රංශයේ තවත් ප්‍රකට සංගීතඥයකු උභතෝකෝටිකයකට මුහුණ දෙමින් සිටියේය.ඔහුගේ නවතම සංගීත නිර්මාණයක් සඳහා ඔහු බලාපොරොත්තු වන මට්ටමේ හඬක් ප්‍රංශය තුළ නොවීය. විවිධාකාරයේ ප්‍රංශ ගායිකාවන්ගේ හඬ පරීක්ෂා කළද ඉන් ඔහු සෑහීමකට පත් නොවුනේය

ජීන් ජැක්ස් ගෝල්ඩ්මන් (Jean Jaques Goldman) නම් ඔහුට අවසානයේදී සිරිමා වීරතුංග තුළින් තමන් සොයමින් සිටි නැවුම් හඬ පෞරුෂය මුණ ගැසුණේය.
සංවාදාත්මක ස්වරයෙන් ලියැවුණු La Bas නම් මෙම ගීයට තමන් සමග දිවියේ නව තෝතැන්නක් සොයා යෑමට පිය නගනා ලෙස පෙම්වතියට ආරාධනා කරන පෙම්වතෙකු සහ එසේ නොයා තමන් සමඟ විවාහ වී ස්ථාවර ජීවිතයක් ගත කරන ලෙස බැගෑපත්වන පෙම්වතියක නිරූපණය විය. මේ ගීතය ගැන ඇසූ වහාම සිරිමා ඊට දායක වීමට සිය කැමැත්ත පළ කළාය.පසුව ගෝල්ඩ්මාන් විසින් හෙලිකල තිබූ තිබෙන පරිදි ඇය සමග කතාබහේ යෙදීමට ඔහු කුඩා ආපන ශාලාවක් වෙත ගොස් ඇත.එහිදී ඇයගේ මුඛරි ස්වභාවය නිසා අදාළ ගීයට අවශ්‍ය හඬ පමණක් නොව ජීව ගුණයෙන්ද ඇය පිරිපුන් බව ඔහු විසින් වටහා ගෙන ඇත. ශබ්දාගාරයේ සිදුකළ කෙටි පර්යේෂණයකින් අනතුරුව යළිත් ඔවුන් ගීතය පටිගත කිරීම සඳහා දින යොදා ගෙන ඇත.

මෙම ගීතය එළිදැක්වීමත් සමඟ පළමු සතියේ සියලුම ගීත දර්ශකවල ඉහළම තැන වැජඹුණු අතර ගීතයේ පිටපත් ලක්ෂ ගණනක් පළමු මාසය තුළම අලෙවි විය.
මෙම ගීයේ සාර්ථකත්වයත් සමගම ගෝල්ඩ්මන් සමග එළිමහන් සංදර්ශන සහ විදේශ සංචාර ඇය වෙත ගලා එන්නට විය.කෙසේවෙතත් මේ බොහෝ ආරාධනා ප්‍රතික්ෂේප කිරීම ඇගේ රසිකයන්ගේ මවිතයට හේතුවක් විය.ඇගේ රුවින් සඟරාවල මුල් කවර පවා සැරසෙද්දී ඇය සිය පුතු සහ සැමියා සමග පැරීසියේ කුඩා කාමරයක දිවි ගෙවමින් බාහිර පාර්ශව වලට තේරුම්ගත නොහැකි අන්දමේ ජීවිතයක් ගත කළාය.

වසර දෙකක් පමණ කාලයක් යම් තාක් දුරකට නිහඬ ජීවිතයක් ගත කළ ඇය වයස අවුරුදු 25 වන විට තනිවම ගීත ඇල්බමයක් Part of me නමින් නිර්මාණය කිරීමට තීරණය කළ අතර ඒ සඳහා ඇගේ සහයට පැමිණියේ පිලිපේ දෙල්ට්‍රෙස් ය.

එම බොහෝ ගීත ඇය අතින් ලියැවුණු අතර එම ගීත ඇගේ ජීවිතය පිළිබිඹු කරන කැඩපතක් වැනි විය.තමන්ට කුඩා කල අහිමි වූ පිය සෙනෙහස සහ අද වන විට තමන්ගේ ජීවිතය බවට පත්ව සිටින කුඩා පුතු කිම් ගීත දෙකකට වස්තු විෂය විය.

තවත් ගීතයකින් යම් පුද්ගලයෙකු ඇයට ආදරය කරන ඔහුගේම ආකාරය පිළිබඳව(His way of Loving me) ඇය සිය රසිකයන්ට කියා තිබුණි. තමන් ඔහුගේ පමණක් කර කර ගැනීමට උත්සහා ගන්නා මානසික වශයෙන් අසමතුලිත වූ පුද්ගලයෙකුගේ ප්‍රචණ්ඩත්වයට තමන් ගොදුරු වී සිටින සිටින අනුවේදනීය ආකාරය ඇය ලොවට කීවාය.

ගී තැටිය නිකුත් වී සති තුනක් ගත වන විට එම ගීත කෙමෙන් කෙමෙන් රසිකයන් අතර ජනප්‍රිය විය. ඇය දිවා රෑ දෙකෙහිම වෙහෙසක් නොබලා එහි ප්‍රචාරණ කටයුතු වල නිරත වූවාය.

1989 දෙසැම්බර් 7 වැනිදා අතිශයින් විඩාබරව සිය නිවසට පැමිණි ඇය ඉදිරියට පැමිණියේ සිය බිරිඳගේ ජනප්‍රියත්වය කෙරෙහි දැඩි ඊර්ෂ්‍යාවෙන් පෙළුණු සැමියෙකි. තමන් දුම්රියපොලක ගී ගයද්දී තම බිරිඳ ප්‍රංශයේ ජනප්‍රිය ගායිකාවක් වීම ඔහුට ඉහිලුම් නොදෙන්නක් විය. සංගීත ක්ෂේත්‍රය තුළ තමන්ට කිසිසේත් බලාපොරොත්තු නොවිය හැකි තරම් දුරක් තම බිරිඳ ගමන් කිරීම පිළිබඳව ඔහු ඊර්ෂ්‍යාවෙන් දැවුණේය.

ඔහුගේ බලපෑම නිසා මේ වන විටත් ඇයව බොහෝ කැපකිරීම් කර තිබුණාය. ඉහත දී සඳහන් කළ අන්දමට ගෝල්ඩ්මාන් සමහ ඇය ආරම්භ කර තිබූ සංගීත දිවියට තිත තබන්නට ඇය තීරණය කර තිබුණේ සිය විවාහ ජීවිතය රැක ගැනීමේ අරමුණෙනි. ඇතැම්විට තමන්ට අහිමි වූ පිය සෙනෙහස සිය දරුවාට අහිමි කිරීමට ඇයට සිත් නොදෙන්නට ඇත.

නමුත් අවසානයේ ඇගේ ඉවසීමේ සීමාව ඉක්මවා ගොස් තිබුණි. ඔහුගේ මේ මානසික සහ ශාරීරික පීඩා ඉවසිය නොහැකි බවත් තමන් ඉක්මනින් ඔහුගෙන් වෙන් වන බවත් ඇය ආවේගශීලීව ප්‍රකාශ කළාය.කිසිසේත් බලාපොරොත්තු නොවූ ඇගේ මෙම ප්‍රකාශයත් සමඟ ඇගේ සැමියාට මාරාවේශ විය.කෝපයෙන් දැවෙන්නට වූ ඔහු ක්ෂණයෙන් මුළුතැන්ගෙට දිව ගියේය.මුළුතැන්ගෙය දෙවනත් කරමින් පිහියක් සොයා ගත් ඔහු යළිත් පැමිණ මීට හය වසරකට පෙර තමන් හට පිදු ඇගේ හදවත දැදුරු කළේය.1964 ආදරවන්තයන්ගේ දිනයේදී මෙලොව එළිය දුටු සිරිමා වීරතුංග තමන් විසින් ආදරය පිදූ පුද්ගලයාගේ අතින් 1989 දෙසැම්බර් 9 වන දා මිය ගියාය.මෙසේ ජගත් සංගීතය තුළ අභිෂේක ලැබීමට නියමිතව තිබූ ශ්‍රි ලාංකික ගායිකාවකගේ අවසානය සිදු විය.

ඇගේ ඝාතනයෙන් මුළු ප්‍රංශයම කැළඹී ගිය අතර මින් වඩාත් කම්පාවට පත්වූයේ ගෝල්ඩ්මාන්ය. ඔහු විසින් වසර කීපයක් යන තෙක් La Bas ගීතය සඳහා වෙනත් ගායිකාවක් යොදා ගැනීමෙන් වැළකුණු අතර ප්‍රසංග වේදිකාවේදී සිරිමා විසින් ගෑවුණු කොටස ගායනා කිරීම සඳහා රසිකයන්ට ආරාධනා කළේය. අවසානයේදී එම ගීතයට සාධාරණයක් කළ හැකි තවත් ගායිකාවක් සමග එම ගීතය ගෝල්ඩ්මාන් ගැයුවේය. එම ගායිකාව සෙලිනි ඩියෝන් වීම සිරිමාගේ හඬට ගෝල්ඩ්මාන් විසින් පිදූ ගෞරවයකි.

දිල්ට්‍රෙස් පවා තමන් ඇගේ ගායන හැකියාව හඳුනා නොගෙන සිටියා නම් ඇගේ ජීවිතය සුරැකෙනු ඇතැයි පශ්චත්තාප වූයේය. මෙම අපරාධය වෙනුවෙන් ඝාතකයාට වසර 9ක සිර දඬුවමක් නියම වූ අතර පසුව ඔහුව ප්‍රංශයෙන් පිටුවහල් කෙරුණි.

(උපුටා ගැනීම manthrana වෙබ් අඩවියෙනි)