ඉදිරි මාසවලදී පළාත් සභා මැතිවරණය පැවැත්වීම නිශ්චිත කරමින් නොවැම්බරයේ ආණ්ඩුව ඉදිරිපත් කිරීමට සූදානමින් සිටින අතුරු සම්මත ගිණුමෙන් විශාල මුදල් ප්‍රමාණයක් රාජ්‍ය සේවා, පළාත් සභා සහ පළාත් පාලන අමාත්‍යාංශයට වෙන් කිරීමට පියවර ගෙන ඇත.

ඒ අනුව එම අමාත්‍යාංශයට රුපියල් බිලියන 194ක් වෙන් කර ඇති අතර වැඩිම මුදල් වෙන් කොට ඇත්තේ එම අමාත්‍යංශයටය.

දෙවනුවට වැඩිම මුදල් වෙන් කර ඇත්තේ ආරක්ෂක අමාත්‍යංශයට වන අතර එම මුදල රුපියල් බිලියන 174කි.

අග්‍රාමාත්‍ය මහින්ද රාජපක්ෂ මහතා යටතේ පවතින මුදල් අමාත්‍යාංශය රුපියල් බිලියන 136ක් ලබා තෙවැනි ස්ථානයේ සිටී.

රාජපක්ෂ මහතා සතුව ඇති අනෙකුත් අමාත්‍යාංශ දෙක වන නාගරික සංවර්ධන හා නිවාස අමාත්‍යාංශය සහ බුද්ධශාසන, ආගමික හා සංස්කෘතික කටයුතු අමාත්‍යාංශයට පිළිවෙලින් රුපියල් බිලියන 27 ක් සහ රුපියල් බිලියන 2.8 ක් වෙන් කර ඇත.

ප්‍රධාන අමාත්‍යාංශ කිහිපයකට සැලකිය යුතු ලෙස කුඩා ප්‍රතිපාදන ලැබී තිබේ. වරාය හා නාවික අමාත්‍යාංශයට වෙන් කර ඇත්තේ රුපියල් බිලියන 4.1ක් පමණක් වන අතර ඉඩම් අමාත්‍යාංශයට රුපියල් බිලියන 4.4ක් ලබා ගැනීමට නියමිතය. වැවිලි අමාත්‍යාංශයට රුපියල් බිලියන 4ක් ද, විදුලිබල අමාත්‍යාංශයට රුපියල් බිලියන 5.2 ක් ද ලබා දී තිබේ.

කෙසේවෙතත් නාමල් රාජපක්ෂ මහතාට අයත් ක්‍රීඩා හා තරුණ කටයුතු අමාත්‍යාංශයට රුපියල් බිලියන 5.4 ක වැඩි ප්‍රතිපාදනයක් ලැබෙනු ඇත.

ඉහළ ප්‍රතිපාදන ඇති අනෙකුත් අමාත්‍යාංශ අතර මහාමාර්ග අමාත්‍යාංශය රුපියල් බිලියන 88ක් ද, සෞඛ්‍ය අමාත්‍යාංශය රුපියල් බිලියන 76 ක් ද වේ.

අධ්‍යාපන අමාත්‍යාංශයට රුපියල් බිලියන 70ක් ලැබෙනු ඇත. ජල සම්පාදන අමාත්‍යාංශයට රුපියල් බිලියන 35ක්, ප්‍රවාහන අමාත්‍යාංශයට රුපියල් බිලියන 33ක්, කෘෂිකර්ම අමාත්‍යාංශයට රුපියල් බිලියන 28ක් සහ වාරිමාර්ග අමාත්‍යාංශයට රුපියල් බිලියන 16ක් ලැබෙනු ඇත.

නව රජය විසින් විදුලිබල හා බලශක්ති අමාත්‍ය ධුරය දෙකට බෙදූ අතර බලශක්ති අමාත්‍යාංශයට ලැබෙන්නේ රුපියල් මිලියන 79ක් පමණි. පරිසර අමාත්‍යාංශය විසින් රුපියල් මිලියන 535 ක් ලබා ගනී.

COVID-19 වසංගතය හේතුවෙන් සංචාරක අංශය දැඩි ලෙස පීඩාවට පත්ව සිටියද සංචාරක අමාත්‍යාංශයට වෙන් කොට ඇත්තේ රුපියල් බිලියන 1.2ක් පමණි.

සිව්වන අඩුම ප්‍රතිපාදන වෙන් කර ඇත්තේ කම්කරු අමාත්‍යාංශයට වන අතර එය රුපියල් බිලියන 1.6කි.

වෙළඳ, කර්මාන්ත, ධීවර හා වනජීවී හා වන සංරක්ෂණ අමාත්‍යාංශවලට ද රුපියල් බිලියන 3කට අඩු මුදලක් ලැබෙනු ඇත.