ආර්ථික පුනර්ජීවනය වෙනුවෙන් සරල බදු ක්‍රමයක් හඳුන්වාදීම සඳහා බදු පනත් කිහිපයක් සංශෝධනය කිරීමට කැබිනට් අනුමැතිය හිමි වී තිබේ.

සම කැබිනට් ප්‍රකාශක අමාත්‍ය උදය ගම්මන්පිල මහතා මේ බව පැවසුවේ අද (27) පැවති කැබිනට් තීරණ  දැනුම්දීමේ ප්‍රවෘත්ති සාකච්ඡාවට එක්වෙමිනි.

මේ සඳහා 2019 නොවැම්බර් මස 27 වන දින පැවති අමාත්‍ය මණ්ඩල රැස්වීමේ දී අනුමැතිය හිමිව තිබේ.

2020 වර්ෂයේ දෙවන භාගයේ දී ආර්ථිකය යළි යථා තත්ත්වයට පත් වනු ඇතැයි අපේක්ෂා කරන අතර ඊට අනුගතව පහත් සඳහන් පනත් සංශෝධනය කිරීමට අවශ්‍ය නීති කෙටුම්පත් රජයේ ගැසට් පත්‍රයේ පළ කර පාර්ලිමේන්තුවට ඉදිරිපත් කිරීමට සඳහා ඉදිරිපත් කළ යෝජනාවට මෙලෙස කැබිනට් මණ්ඩල අනුමැතිය හිමිව තිබේ.

2009 අංක 9 දරන ජාතිය ගොඩනැඟීමේ බදු පනත

2006 අංක 13 දරන ආර්ථික සේවා ගාස්තු පනත 

2011 අංක 18 දරන වරාය හා ගුවන්තොටුපළ සංවර්ධන බදු පනත

2018 අංක 35 දරන මුදල් පනත 

එමෙන්ම, 2017 අංක 24 දරන දේශීය ආදායම් පනත හා 2002 අංක 14 දරන එකතු කළ අගය මත බදු පනත අවශ්‍ය සංශෝධන සිදුකිරීමට නීති කෙටුම්පත් සම්පාදකට උපදෙස් ලබා දීම සඳහා ද අමාත්‍ය මණ්ඩල අනුමැතිය

හිමිව තිබේ.

මෙහිදී මාධ්‍යවේදීන් විසින් කැබිනට් ප්‍රකාශවරුන්ගෙන් ප්‍රශ්න කිහිපයක් ද අසා සිටියේය.

ප්‍රශ්නය – බරපතළ ප්‍රශ්නයක් වුණා මේ විදුලි කප්පාදුව. දැන් ඇමතිතුමා ඉල්ලා අස්වෙන්න ඕනේ නැද්ද? දැන් විදුලි අධිකාරවරයා ද වැරදිකාරයා වෙලා තියෙන්නේ ?

අමාත්‍ය කෙහෙළිය රඹුක්වැල්ල – “ සිද්ධිය වන අවස්ථාවේ ඇමතිවරයා වැඩ බාර ගෙන පැය 96යි.“

අමාත්‍ය උදය ගම්මන්පිල – “ රජයේ සේවකයෙක් අතින් වැරැද්දක් සිදුවන විට හෝ වැරැද්දක් සිතාමතා කළහොත් හරි ගත යුතු ක්‍රියාමාර්ග ගැන ආයතන සංග්‍රහයේ සඳහන් වෙනවා.“

ප්‍රශ්නය – සමගි ජන බලවේගය ප්‍රධාන විපක්ෂයේ කණ්ඩායම ඊයේ වෙනම ව්‍යාපාරයක් පටන්ගත්තා 19 සුරකිමු කියලා ?

අමාත්‍ය කෙහෙළිය රඹුක්වැල්ල – “තුන්වන වතාවටත් විපක්ෂය අසාර්ථක වෑයමක නිරත වෙනවා. අපේ මැතිවරණ ප්‍රකාශනයේ තිබෙන ප්‍රධාන කරුනක් 19 වන සංශෝධනය එයට මේ රටේ ඉතිහාසයේ පළමු වතාවට තුනෙන් දෙදෙක බලයක් ලබා දී තිබෙනවා.“

ප්‍රශ්නය – ආනයනය සීමාකිරීම තුළ වාහන අමතර කොටස් සම්බන්ධයෙන් විශාල හිඟයක් පවතිනවා. ජයසුන්දර මහත්තයා කියලා තිබුණා අවුරුදු දෙකහමාරකට වාහන තියෙනවා කියලා. නමුත්, වාහන තියෙනවා සුඛෝපභෝගි ජීවිත ගතකරන අයට. සාමාන්‍ය පුද්ගලයන්ට මිලියනයක් දෙකක් තුනක් දීලා ලියාපදිංචි නොකළ වාහනයක් ගන්න වෙළෙඳපොළේ ඉඩක් නැහැ ?

අමාත්‍ය රමේෂ් පතිරණ – “එම තහනමට ලක්වන සුඛෝපභෝගි වාහන හැරුණ විට පොදු ප්‍රවාහන වාහන සඳහා හා කෘෂි කර්මාන්තයේ හා කර්මාන්ත අංශ සඳහා අවශ්‍ය වාහන සඳහා කිසිදු තහනමක් නැහැ. නමුත් ලංකාවේ නිෂ්පාදනය නොවන අමතර කොටස් ගෙන්වීමටත් අවසර හිමිවෙනවා.“