රුසියාව නුදුරේදීම සර්බියාව, කියුබාව සහ ජපානය සමඟ මගී ගුවන් ගමන් නැවත ආරම්භ කරන බව එරට විදෙස් වාර්තා සඳහන් කරයි.

ඒ අනුව, මෙම රටවලට ගුවන් ගමන් නොවැම්බර් 1 සිට විවෘත කළ හැකිවනු ඇති බව එරට ආරංචි මාර්ග වල දැක්වේ. එහිදී මොස්කව් සිට සර්බියාව (Belgrade) සහ කියුබාව ( Cayo-Coco සහ Santa Clara) වෙත ගුවන් යානා සතියකට දෙවරක් පියාසර කරනු ඇත.

මීට අමතරව, රුසියාවේ සිට ස්විට්සර්ලන්තය, මාලදිවයින, එක්සත් අරාබි එමීර් රාජ්‍යය සහ බෙලරුසියාව දක්වා ගුවන් ගමන් වාර ගණන වැඩි කිරීමටද රුසියාව පියවර ගෙන තිබේ.

තවද රුසියානු සංචාරකයින් සඳහා සර්බියාව විවෘත කරන බව ඔක්තෝබර් 13 වන දින ප්‍රකාශයට පත්කර ඇත. අන්තර්ජාතික ගුවන් ප්‍රවාහන සංගමය (IATA) විසින් සම්පාදනය කරන ලද ලැයිස්තුවට අනුව රුසියාව, “සීමා රහිත” (not restrictive) කාණ්ඩයට ද ඇතුලත් කරගෙන තිබේ. රුසියාවට අමතරව මෙම ශ්‍රේණිගත කිරීමට මෙක්සිකෝව, තුර්කිය, බ්‍රසීලය, ඇල්බේනියාව, ඇෆ්ගනිස්ථානය, හයිටි සහ උතුරු මැසිඩෝනියාව ඇතුළත් වී තිබේ.

වර්තමානයේදී තුර්කිය, එක්සත් අරාබි එමීර් රාජ්යය, මාලදිවයින, ඊජිප්තුව, ටැන්සානියාව, බෙලරුස්, එක්සත් රාජධානිය, ස්විට්සර්ලන්තය, දකුණු කොරියාව, කසකස්තානය සහ කිර්ගිස්තානය රුසියානු සංචාරකයින් සඳහා විවෘත ව පවතී.

මූලාශ්‍ර news.mail.ru