පසුගිය දින, රුසියානු ජනාධිපති ව්ලැඩිමීර් පුටින් සිය වර්ෂ අවසන් මාධ්‍ය සාකච්ඡාව අවසන් කළේය. එහිදී, බටහිර රටවල් සමඟ පවතින සබඳතා හා දේශීය දේශපාලන ගැටළු, ඉහළ කොවිඩ්-19 මරණ සහ විවිධ පීඩනයන් මධ්‍යයේ ක්‍රෙම්ලිනයේ දේශීය හා විදේශීය ප්‍රතිපත්තිමය ස්ථාවරයන් පිළිබඳව දෙස් විදෙස් මාධ්‍ය විචාලේය.

නැටෝව සමග කතාබහ;
පසුගිය සතියේ මොස්කව් වොෂින්ටනයට සහ නේටෝවට යෝජනා මාලාවක් නිකුත් කලේ එක්සත් ජනපදය ප්‍රමුඛ මිලිටරි කන්ඩායම එහි දේශසීමා වලට සමීප නොවන බවට සහතිකයක් ලබා ගැනීමේ උත්සාහයක කොටසක් ලෙස ය.
බටහිර හමුදා සහ ආයුධ පැරණි සෝවියට් රටවල් වෙත රතු රේඛාවක්( redline ) ලෙස යෙදවීමේ අපේක්ෂාව හා යුක්‍රේන දේශපාලකයින්ගේ ඊට සම්බන්ධ වීමට ඇති පොරොන්දුව සාක්‍ෂාත් නොවන බවට ලිඛිත පොරොන්දු ක්‍රෙම්ලීනයේ ඉල්ලීම් වලට ඇතුලත් විය.
දිනකට පෙර විදේශ අමාත්‍ය සර්ගෙයි ලැව්රොව් ප්‍රකාශ කළේ රුසියානු නිලධාරීන් සහ ඇමරිකානු රාජ්‍ය තාන්ත්‍රිකයින් අතර සාකච්ඡා ලබන වසරේ ජනවාරි මාසයේදී ඉක්මනින් පැවැත්වෙන බවයි.
කෙසේ වෙතත්, ජනාධිපති පුටින් අවධාරනය කළේ රැස්වීම් පමණක් ප්‍රමාණවත් නොවන බවයි. “අපිට සාකච්ඡාවලින් වැඩක් නැහැ, අපට අවශ්‍ය ප්‍රතිඵලයි,” ජනාධිපතිවරයා කියා සිටියේය. “1990 ගණන්වල සිට ඔවුන් අපට කියා සිටියේ නැගෙනහිරට අඟලක්වත් ඇතුලත් නොවනවා කිවූවත්, සිදු වූ දේ බලන්න – ඔවුන් දැඩි ලෙස හා අමු අමුවේ අපව රවටා ඇත.” “දැන් ඔවුන් පවසන්නේ, ඔවුන්ට යුක්‍රේනයද ලැබෙනු ඇති බවයි”.
“මෙයින් අදහස් කරන්නේ ඔවුන් නිල වශයෙන් නේටෝවේ කොටසක් නොවුනත් ඔවුන්ගේ ආයුධ එහි යොදවන බවයි.” රුසියානු නායකයාට අනුව, “දශක ගණනාවක් තිස්සේ” ඒ ගැන නොකඩවා කතා කරනවා වෙනුවට “වහාම” සහතිකවීම දැන් එක්සත් ජනපදය ප්‍රමුඛ කණ්ඩායමට පැවරී ඇත.
වෝර්සෝ ගිවිසුම බිඳ වැටීමෙන් ඉතිරි වූ හිඩැස පිරවීමට නේටෝව උත්සාහ නොකරන බවට, බටහිර නිලධාරීන් සෝවියට් ජනාධිපති මිහායිල් ගොර්බචෙව්ට පොරොන්දු වූ බව පුටින් මීට පෙරද ප්‍රකාශ කලේය. නමුත් හංගේරියාව, ලැට්වියාව, ස්ලෝවැකියාව සහ පෝලන්තය වැනි නැඟෙනහිර කණ්ඩායම් රටවල් සාමාජිකයන් ලෙස ඇතුලත් කරගත්හ. කෙසේ වෙතත්, නේටෝ ප්‍රධාන ලේකම් ජෙන්ස් ස්ටෝල්ටන්බර්ග් යුක්රේනයේ සාමාජික උවමනාවන්ට තුන්වන රටක් බාධා නොකළ යුතු බව නැවත නැවතත් ප්‍රකාශ කර ඇති අතර, මහාද්වීපයේ ප්‍රදේශවලට බලපෑම් කිරීම සඳහා රුසියාවට “අයිතියක්” නොමැති බවට මේ මස මුලදී තර්ක කළේය.
පසුගිය අඟහරුවාදා, ඉහළ පෙළේ හමුදා නිලධාරීන් සමඟ පැවති රැස්වීමකදී, පුටින් අනතුරු ඇඟවූයේ යුක්රේනයේ රොකට් ස්ථානගත කිරීම නේටෝවට “මොස්කව් වෙත ඔවුන්ගේ පියාසර කාලය විනාඩි හතේ සිට දහය දක්වා අඩු කිරීමටත්, හයිපර්සොනික් ආයුධ යෙදවන්නේ නම්, විනාඩි පහක් දක්වාත් අඩු කිරීමට ඉඩ සැලසෙනු ඇති බවයි. ” පෙනෙන තර්ජනයෙන් තම භූමිය ආරක්ෂා කර ගැනීමට පියවර ගන්නා බවට රුසියාව අනතුරු අඟවීය.

යුක්රේනය;
කෙසේ වෙතත්, බ්‍රහස්පතින්දා පුටින් පැවසුවේ රුසියාව “කෝප නොවන” බවත්, “එය ප්‍රකෝප කිරීමක ප්‍රතිඵලයක් වුවද, එවන් යුද්ධයක අවදානම් ගණනය කිරීම” වැදගත් බවත් ය. ඔහුට අනුව, සෝවියට් සංගමය බිඳවැටීමත් සමග යුක්රේනයේ බොහෝමයක් ඉඩම් ඓතිහාසිකව “රුසියාවෙන් කපා හරින ලද රුසියානු ජනගහනය සහිත රුසියානු ඉඩම්” වේ. “අපි මේක පිළිගත්තා,” ඔහු තර්ක කළේය. “අපි නව රාජ්‍යයන්ට වර්ධනය වීමට උදව් කළ අතර ඔවුන්ගේ විදේශ ප්‍රතිපත්තිය කුමක් වුවත් සියලු රජයන් සමඟ වැඩ කළෙමු”. [ජනාධිපති වික්ටර්] යුෂෙන්කෝ සහ [අගමැති යුලියා] තිමොෂෙන්කෝ සමඟ අපගේ සබඳතා මතකද? අද නායකත්වය මෙන්ම ඔවුන් ද කතා කළේ බටහිර ගැති හැඩගැස්ම ගැනයි. අපි ඔවුන් සමඟ කතා කළා, අපට යම් යම් වාද විවාද, ගැටුම් තිබුන. ගෑස් ආදිය ගැන එහෙම. නමුත් අපි සංවාදයක යෙදෙමින් ඔවුන් සමඟ වැඩ කර ඉදිරියට යාමට සූදානම්ව සිටියෙමු, අපි ක්‍රිමියාව ගැන කිසිවක් කිරීමට සිතුවේවත් නැත.” කෙසේ වෙතත්, 2014 දී මතභේදයට තුඩු දී ඇති ප්‍රදේශය රුසියාව නැවත එකතු කරගැනීම ආරම්භ වූයේ එවකට ජනාධිපති වික්ටර් යනුකොවිච්ගේ තේරී පත් වූ රජය පෙරලා දැමූ යුක්රේනයේ මයිඩාන් නැගිටීමෙන් පසු ඇති වූ නොසන්සුන්තාව සහ ප්‍රචණ්ඩත්වය හේතුවෙන් . ක්‍රිමියාව ජනමත විචාරණයකින් පසු මොස්කව් පාලනයට ආපසු පැමිණි අතර, එය ප්‍රායෝගිකව අනෙකුත් සියලුම රටවල් පිළිගෙන නැති අතර කීව් පාලනය අවධාරනය කරන්නේ එය ඔවුන්ගේ ස්වෛරී භූමිය ලෙස පවතින බවයි. පසුගිය මාස කිහිපය තුළ දරුණු සටන් පැවති යුද්ධයෙන් විනාශ වූ දොන්බාස් කලාපයේ නොසන්සුන්තාවේ බීජ වපුරනු ලැබුවේ මයිඩාන් විසින් බව ද රුසියානු ජනාධිපතිවරයා ප්‍රකාශ කළේය. දොන්බාස් වල සිදුවන දේ අපි අසරණව බලා සිටිය යුතුද? සෝවියට් සංගමය පිහිටුවන විට, ඔවුන් සිතුවේ ඔවුන් රුසියාවේ කොටසක් බවයි. නමුත් [හිටපු සෝවියට් නායක ව්ලැඩිමීර් ලෙනින්] සහ සමහරුන්, ඔවුන්ට වෙනත් රටක කොටසක් වීමට බල කළා. ඔවුන් පෙර කිසිදා නොතිබූ රාජ්‍යයක් ස්ථාපිත කළා,” ඔහු කියා සිටියේය.

ආර්ථික ප්‍රකෘතිමත් වීම;
පුටින්ට අනුව, රුසියානු ආර්ථිකය “COVID-19 වසංගතයේ අභියෝගවලට සහ එයට අවශ්‍ය සීමාවන්ට මුහුණ දුන්නේය… නමුත් කෙසේ වෙතත්, බොහෝ ප්‍රමුඛ අභියෝගවලට වඩා මෙම අභියෝග සඳහා වඩාත් ශක්තිමත්ව සූදානම් විය.” කෙසේ වෙතත්, ඔහු පැවසුවේ, 8% හි පවතින වර්තමාන උද්ධමන අනුපාතය ඉතා ඉහළ මට්ටමක පවතින අතර, රුසියාවේ මහ බැංකුව දැඩි මූල්‍ය ප්‍රතිපත්තියක් අනුගමනය නොකළේ නම්, එය තුර්කියේ දක්නට ලැබෙන ආකාරයේ ආර්ථික අවුල් ජාලයකට පහසුවෙන් ලිස්සා යා හැකිව තිබුණි. මූල්‍ය පීඩනය මූලික පාරිභෝගික භාණ්ඩ සඳහා තියුනු මිල ඉහල යාමට තුඩු දී ඇත. “අපි දැන් උද්ධමනය නොසලකා හැරියහොත්, ජනගහනයේ අවම ආරක්ෂිත කණ්ඩායම් දුක් විඳිනු ඇති” බව මහ බැංකු අධිපති Elvira Nabiullina අනතුරු අඟවා ඇත්තේය. විදේශ අරමුදල් සම්බන්ධ රට තුළ විදේශ ආයතනයක් ලෙස ලියාපදිංචි වී ඇති ලෙවාඩා මධ්‍යස්ථානය විසින් අගෝස්තු මාසයේ දී කරන ලද මත විමසුමකින් කියැවුණේ, පසුගිය හයමස තුළ මුදල් හිඟකම හේතුවෙන් සෑම පුරවැසියන් පස් දෙනෙකුගෙන් දෙදෙනෙකුට ආසන්න ප්‍රමාණයක් ආහාර පාන නොමැතිව සිට ඇති බවයි. සති කිහිපයකට පෙර ප්‍රකාශයට පත් කරන ලද සංඛ්‍යාලේඛන පෙන්නුම් කළේ පසුගිය වසර තුළ ආහාර මිල ගණන් 7.4% කින් ඉහළ ගොස් ඇත යනුවෙනි.

චීනය සමඟ සබඳතා;
පුටින් තම චීන සගයා වන ෂී ජින්පිං වෙත ප්‍රශංසා කරමින් කියා සිටියේ අප එකිනෙකා “මිතුරන්” ලෙස හඳුන්වන බවයි. “අපට ඉතා විශ්වාසදායක සබඳතා ඇති අතර එය අපට හොඳ ව්‍යාපාරික සබඳතා ගොඩනඟා ගැනීමට ද උපකාරී වේ,” පුටින් තවදුරටත් තර්ක කරමින්, “අද චීනයේ ආර්ථිකය දැනටමත් මිලදී ගැනීමේ ශක්තිය, සමානතාව අනුව ඇමරිකාවට වඩා විශාල ය.” ඔහුට අනුව, “2035-2050 වන විට, [නාමික වශයෙන්] එය අභිබවා යනු ඇති අතර චීනය සියලු මිනුම් දඩු අනුව ලෝකයේ ප්‍රමුඛ ආර්ථිකය බවට පත්වනු ඇත.”
“අපි ආරක්ෂක ක්ෂේත්‍රයේ සහයෝගයෙන් කටයුතු කරනවා. චීන හමුදාව ලෝකයේ වඩාත්ම දියුණු ආයුධ පද්ධති සමඟ සැලකිය යුතු මට්ටමකින් සන්නද්ධ කර ඇත. අපි එක්ව ඇතැම් අධි තාක්‍ෂණික අවි පවා සංවර්ධනය කරමින් සිටිනවා” යැයි රුසියානු නායකයා වැඩිදුරටත් පැවසීය.
කෙසේ වෙතත්, විශ්ලේෂකයින් ගණනාවක් තර්ක කර ඇත්තේ ජාතීන් දෙක අතර සබඳතා විසින් නේටෝ වැනි බටහිර ජාතීන් අතර මිලිටරි හවුල්කාරිත්වයන් නතර කිරීමට බලපාන බවයි. අනෙකුත් ජාතීන්ට එරෙහිව භූ දේශපාලනික කන්ඩායම් නිතර වර්ධනය වන අතර, බීජිං සමඟ මොස්කව්හි සබඳතා “වෙනත් කිසිවෙකු සමඟ ගැටුමක් මත පදනම් නොවේ.” යනුවෙන් රුසියාවේ නැගෙනහිර ආසියා තානාපති වරයෙකු වන අන්ද්‍රෙයි දෙනීසොව් පැවසීය.

යුරෝපයේ ගෑස් අර්බුදය;
මොස්කව් පිටුබලය ලබන Nord Stream 2 නල මාර්ගය අවහිර නොකිරීමට යුරෝපා සංගමයට බලපෑම් කිරීමේ උත්සාහයක් ලෙස රුසියාව හිතාමතාම බටහිර යුරෝපයට ගෑස් සැපයුම අත්හිටුවන බවට කරන ප්‍රකාශ පුටින් නැවතත් ප්‍රතික්ෂේප කළේය. ව්‍යාපෘතිය අවසන් කර ඇති අතර ජර්මානු නියාමන පාලනයේ සහතිකය බලාපොරොත්තුවෙන් සිටී.
මීට පෙර වොෂින්ටනයේ සිට ක්‍රෙම්ලිනයට සහ ප්‍රවෘත්ති ආයතන ගනනාවක් වෙත එල්ල කර ඇති චෝදනා පිටුපස සත්‍යයක් තිබේදැයි ජනාධිපතිවරයාගෙන් විමසන ලදී. “ඇත්ත වශයෙන්ම, එය [ඇත්ත] නොවේ. ඔවුන් නිතරම බොරු කියනවා,” පුටින් අවධාරණය කළේය. “”ගැස්ප්‍රොම්” සමාගම දැනට පවතින කොන්ත්‍රාත්තුවලට අනුකූලව එහි හවුල්කරුවන් විසින් ඉල්ලා සිටින [ගෑස්] පරිමාව සම්පුර්ණයෙන්ම ලබා දෙයි.” අපි යුරෝපීය වෙළඳපොළට එකම සැපයුම්කරුවන් නොවේ. නමුත් බෙදා හැරීම් වැඩි කරන්නේ අපි පමණක් විය හැකිය, ”ඔහු තවදුරටත් පෙන්වාදුන්නේය. “පසුගිය වසරේ අයහපත් කාලගුණික තත්ත්වයන් තිබුණා. දිගු, සීතල වසන්තයේ ගබඩාවලට ප්‍රමාණවත් තරම් ගෑස් පොම්ප කර තිබුනේ නැත. සුළං ටර්බයින වැඩ කළේ ද නැත. මේ සියල්ල හිඟයක් ඇති කර ඇත. ”

කොවිඩ් 19 එන්නත්;
දැනට පවතින වෛරස් වසංගතය පිළිබඳව අදහස් දක්වමින් පුටින් අනතුරු ඇඟවූයේ රුසියාවේ එන්නත් ලබා ගැනීම මන්දගාමීව පවතින බවයි. ඔහුට අනුව, රුසියාවේ සාමූහික ප්‍රතිශක්තිකරණ මට්ටම 59.4% දක්වා ළඟා වී ඇති අතර එය එන්නත් කළ පුද්ගලයින් සහ ආසාදනයෙන් සුවය ලැබූ අයගෙන් සමන්විත වේ. “අපේ අසල්වැසියන් 90-95% ක ආවරණයක් ලබා ගැනීමේ අවශ්‍යතාවය ගැන කතා කරයි. අපේ 59.4% – එය අඩුයි, ”ඔහු පැවසීය. කෙසේ වෙතත්, 2022 පළමු හෝ දෙවන කාර්තුව වන විට රුසියාවට 80% දක්වා ළඟා විය හැකි බවට ඔහු බලාපොරොත්තුවෙන් සිටින්නේය. වසරකට පෙර ලොව ප්‍රථම කොරෝනා වයිරස් එන්නත එළිදැක්වුවද, එන්නතට නිදහසේ ප්‍රවේශ විය හැකි වුවද, එන්නත ගැන දෙගිඩියාව හා සැකය නිසා ජාතියේ ප්‍රතිශක්තිකරණ ව්‍යාපාරය අඩාල වී ඇත.
බන්ධනාගාරයේ වධහිංසා පැමිණවීම
Gulagu.net මානව හිමිකම් කණ්ඩායම රැඳවියන්ට ලිංගික සහ ශාරීරික හිංසනයන් සිදු කළ බව කියනු ලබන වීඩියෝ පට ගණනාවක් නිකුත් කිරීමෙන් පසුව, රුසියානු බන්ධනාගාරවල සහ නිවැරදි කිරීමේ පහසුකම්වලින් මෑත කාලීන අපකීර්තියන් මාලාවක් පිළිබඳව පුටින් අදහස් දැක්වීය. කම්පන සහගත වීඩියෝ කොටස් පිළිබඳ පරීක්ෂණයක් මධ්‍යයේ නිලධාරීන් දුසිමකට වඩා සේවයෙන් පහ කර ඇති අතර ක්‍රෙම්ලිනය ෆෙඩරල් බන්ධනාගාර පද්ධතියේ අධ්‍යක්ෂ ඇලෙක්සැන්ඩර් කලෂ්නිකොව් සේවයෙන් පහ කළේය.

ඇලෙක්සි නවාල්නි;
දැනට බන්ධනාගාර ජනපදයක සිරවී සේවය කරන විපක්ෂ චරිතයක් වන ඇලෙක්සි නවාල්නි ගැන විමසූ විට පුටින් පැවසුවේ මෙම ගැටලුව පිළිබඳ පිටුව පෙරළීමට කාලය පැමිණ ඇති බවයි. ඔහුට අනුව, පසුගිය වසරේ මොස්කව් වෙත ගුවන් යානයකදී රෝගාතුර වීමට පෙර ඔහු නොවිචොක් සමඟ වස පානය කළ බවට කරන ලද ප්‍රකාශයන් සනාථ කරන එක ලේඛනයක්වත් රුසියානු පැමිණිලි මෙහෙයවන කාර්යාලයට ලැබී නැත. ඔහු මාධ්‍යවේදීන්ට පැවසුවේ “ඒ ගැන කතා කරන්න අවශ්‍ය නැහැ. අපි ඉදිරියට යමු.” කියායි. බටහිර සහය ලබන ක්‍රියාකාරිකයා, ඔහුගේ ගුවන් යානය සයිබීරියාවේ තොම්ස්ක් නගරයෙන් ගුවන්ගත වී ටික වේලාවකට පසු රෝගාතුර විය. ඔහු රෝහලට ගෙන ගිය අතර, ඔහුගේ පවුලේ අයගේ ඉල්ලීම් අනුව, බර්ලිනයට ගුවන්ගතවී, එහි සායනික ප්‍රතිකාර කරන ලදී. ඔහුගේ ජර්මානු වෛද්‍යවරු පසුව ප්‍රකාශ කළේ ඔහු විෂ සහිත ස්නායු කොටස් සමඟ ඉලක්ක කර ඇති බවයි. චෝදනා ඔප්පු කිරීම සඳහා සාම්පල සඳහා කරන ලද ඉල්ලීම්වලට පිළිතුරු නොලැබුණු බව මොස්කව් අවධාරනය කරයි. 2014 වසරේදී සමාගම් දෙකකින් ඩොලර් 415,000ක් වංචා කිරීමේ චෝදනාවට වරදකරු වූ විට ඔහුට ලබා දුන් අත්හිටවූ සිරදඬුවමක කොන්දේසි කඩ කිරීම සම්බන්ධයෙන් ඔහු සිරගත වීමට ඉඩ ඇති බව දැන දැනත් නවාල්නි මේ වසරේ ජනවාරි මාසයේදී ජර්මනියේ සිට නැවත රුසියාවට පැමිණියේය. ඔහුට වසර දෙකයි මාස අටක සිර දඬුවමක් නියම වී ඇත.

රුසියාවේ අඩුවන ජනගහනය;
පසුගිය වසරේ සාමාන්‍ය ආයු අපේක්ෂාව 71.5 සිට 70.1 දක්වා පහත වැටීම මෙන්ම මරණ සංඛ්‍යාව වැඩි වීම, උපත් අනුපාතය ඇතුළු ප්‍රධාන ජන විකාශන ගැටළු මාලාවකට තම රට මුහුණ දෙන බවට පුටින් අනතුරු ඇඟවීය.
රුසියාවේ අඩු සාඵල්‍යතා අනුපාතිකය ගැන අදහස් දක්වමින් ඔහු කියා සිටියේ, උප ප්‍රශස්ත උපත් සංඛ්‍යාවක්, පශ්චාත් කාර්මික රටවල මිනිසුන්ගේ ප්‍රමුඛතා වෙනස් වීමෙන් අර්ධ වශයෙන් පැන නගින බවයි, එය යුරෝපීය මහාද්වීපයේ දරු ප්‍රසූතියේ වයසේ සිටින කාන්තාවන් අතර වෙනත් තැන්වලද දක්නට ලැබෙන දෙයක්.
“අධ්‍යාපනය, පශ්චාත් අධ්‍යාපනය, වෘත්තීය සහ පසුව ඔබට වයස අවුරුදු 30 දී දරුවෙකු ලැබෙනව, එවිට ඔබ දෙවැන්නක් ගැන සිතන්නේවත් විදිහක් නැත,” යි ඔහු පැවසීය. “ප්‍රජා විද්‍යාවේදීන් පවා, මෙය වෘත්තීයමය වශයෙන් කරන උදවිය වෙලත්, මෙම ක්‍රියාවලීන් සඳහා නිශ්චිත පැහැදිලි පිළිතුරු ඔවුන්ටද නොමැත.”

rt.com ඇසුරෙනි.
ජයන්ත වැලිවිට