අමෙරිකානු හමුදාව සතු තාක්ෂණයෙන් දියුණුම ප්‍රහාරක යානයක් ලෙස F35-C යානය හැඳින්විය හැකිය.

එම ප්‍රහාරක යානයක් පසුගියදා දකුණු චීන මුහුදේ ජාත්‍යන්තර කලාපයේදී අනතුරට ලක්වී මුහුදේ ගිලී ගියේය.

එහි නියමුවා යානාවෙන් එළියට පැන දිවි රැකගත්තේය.

නමුත් මේ වනවිට එම යානය චීන හමුදාවෙන් බේරා ගැනීමට අමෙරිකානු නාවික හමුදාව විශේෂ මෙහෙයුමක් ආරම්භ කර ඇති බව වාර්තා විය.

එම යානය චීන හමුදාව විසින් ගොඩගතහොත් එහි තාක්ෂණික රහස් උකහාගැනීමට චීන විද්‍යාඥයින් කටයුතු කරතැයි අමෙරිකානුවෝ සැක පළ කරති.

ඩොලර් මිලියන 100ක් පමණ වටිනාකමක් ඇති එම F35-C ප්‍රහාරක යානය, USS කාර්ල් වින්සන් නෞකාවේ සිට ගුවන්ගත කිරීමට උත්සාහ දරන විට ඇතිවූ ගැටළුවක් හේතුවෙන් මුහුදට කඩා වැටුණි.

එහිදී නෞකාවේ කාර්යමණ්ඩලයේ 7 දෙනෙක් තුවාල ලබා ඇති බව වාර්තා වුණි.

ජාත්‍යන්තර මුහුදු කලාපයකදී මෙවැනි අනතුරක් සිදුවූ විට එය පළමුවෙන් සොයාගෙන ගොඩගත් පාර්ශ්වයට එහි භාරකාරීත්වය ලැබේ.

එය ගොඩගැනීමට කුමන පියවරක් ගන්නේද යන්න සමබන්ධයෙන් අමෙරිකානුවන් පැහැදිලි ප්‍රකාශයක් කර නොමැත.

දකුණු චීන මුහුද ජාත්‍යන්තර වශයෙන් මත ගැටුමකට පාදක වූ කලාපයකි.

එය සම්පූර්ණයෙන් තමන් සතු බව චීනය පවසයි.

නමුත් අනෙක් ලෝක බලවත්තු එය පිළිනොගනිති.

ආරක්ෂක උපදේශකයෙක් වන අබි ඔස්ටෙන් පැවසුවේ යානය ගොඩගැනීම සඳහා කඩිනමින් ක්‍රියාත්මක විය යුතු බවය.

නැතහොත් එහි “කළු පෙට්ටිය” අක්‍රිය වී යානය සොයාගැනීම අපහසු විය හැකි බව ඇයගේ මතය විය.

“මෙය සොයා ගැනීම අමෙරිකාවට වැදගත්. F-35 යානය පියාඹන පරිගණකයක් වගෙයි. එය නිමවා තිබෙන්නේ අනෙකුත් සම්පත් හා සම්බන්ධයි. විශේෂයෙන්ම ප්‍රහාරක බලඝන සමග.”