යුක්‍රේන රුසියා ගැටුමට මැදිවී සිටින යුරෝපය යුක්‍රේනයට පක්ෂපාතිත්වය දක්වා රුසියාවෙන් ඛනිජ තෙල් ආනයනය කිරීම අත්හිටුවුවහොත් සමස්ථ යුරෝපයට ගෑස් සැපයුම අත්හිටුවන බව රුසියාව පවසන බව විදෙස් මාධ්‍ය වාර්තා කර සිටී.

යුක්රේන රුසියා ගැටුම හේතුවෙන් කැනඩාව ඇතුළු රටවල් කිහිපයක් මේ වන විට රුසියාවෙන් ඉන්ධන ආනයනය අත්හිටුවා ඇත.

එහෙත් ඇමරිකාව මේ වන තෙක් රුසියානු ඛනිජ තෙල් ආනයනය අත්හිටුවා නැතත් ඒ සම්බන්ධයෙන් දැඩි අවධානයක් යොමු කර ඇති බව ධවල මන්දිර ආරංචි මාර්ග උපුටා දක්වන විදෙස් මාධ්‍යය පවසයි.

කෙසේ වුවද සම්බාධක පැනවීමත් සමග බටහිර රටවල් රුසියාවෙන් ඛනිජ තෙල් ආනයනය අත්හිටුවන්නේ නම් යුරෝපයට දැඩි ප්‍රතිවිපාක වලට මුහුණ දීමට සිදුවනු ඇතැයිද රුසියාව අනතුරු අඟවා සිටී. යුරෝපා කලාපයේ ගෑස් අවශ්‍යතාවෙන් 40%ක හා ඛනිජ තෙල් අවශ්‍යතාවෙන් 30%ක සැපයුම්කරුවා වන්රුනේ රුසියාවයි.

මේ වන විටත් යුරෝපයේ ගෑස් මිළ ඉතා ඉහල ගොස් ඇති අතර ඉතිහාසයේ පළමු වතාවට ඩොලර් 3,900ක් දක්වා ඉහළ මිලක් නියම වී ඇත.

යුක්රේනයේ සිදුවෙමින් පවතින රුසියානු හමුදා ප්‍රහාරය මත මෙසේ මිල ගණන් දිගටම ඉහල යමින් පවතින බව දේශපාලන විශ්ලේෂකයෝ පවසති.

මේ අතර රුසියානු රාජ්‍යයේ බලශක්ති දැවැන්තයා සහ ප්‍රධාන ගෑස් අපනයනකරුවෙකු වන ‘ගැස්පෝම්’ සමාගම පවසන්නේ යුක්රේන භූමිය හරහා යුරෝපයට රුසියානු ගෑස් සැපයීම තව දුරටත් සිදුවන බවයි.