එක්සත් ජනපදය සිරියානු ජනතාවගෙන් සහ රජයෙන් තෙල් “සොරකම් කිරීම” නැවැත්විය යුතු බව රුසියානු ජනාධිපති ව්ලැඩිමීර් පුටින් ඊයේ(19) ටෙහෙරානයේදි ඉරාන සහ තුර්කි නායකයන් හමුවීමෙන් පසු පැවසීය. “ඇස්තානා ක්‍රියාවලියේ” ඇපකරුවන් තිදෙනා, එක්සත් ජනපදය යුප්‍රටීස් ගංගාව ආශ්‍රිත ප්‍රදේශයෙන් ඉවත් විය යුතු බවටත් සිරියාවේ මානුෂීය අර්බුදය අමෙරිකා එක්සත් ජනපදයේ ඒකපාර්ශ්වික සම්බාධකවලින් නරක අතට හැරීම නැවැත්විය යුතු බවටත් එකඟ වූහ.

තවද මෙය රුසියාව, ඉරානය සහ තුර්කියේ “පොදු ආස්ථානයක්” බවද රුසියානු ජනාධිපතිවරයා අවධාරණය කළේය.

ඉස්ලාමීය රාජ්‍යය හෙවත් ISIS ත්‍රස්තවාදීන් පරාජය කිරීමෙන් පසු අමෙරිකා එක්සත් ජනපදයේ උපකාර ලබන සිරියානු ප්‍රජාතන්ත්‍රවාදී හමුදා (SDF) නම් කණ්ඩායම විසින් ප්‍රධාන වශයෙන් සිරියාවේ ඊසානදිග තෙල් ළිං සහ තිරිඟු බිම් පාලනය කරමින් පාලනය කරනු ලබති. ඒ අනුව අමෙරිකා එක්සත් ජනපද හමුදා සිය ගණනක් නීතිවිරෝධී ලෙස සිරියාවේ රැඳී සිටිති. එක්සත් ජනපදයේ පිටුබලය ලබන SDF මිලිෂියාව දමස්කස්හි අසාඩ්ගේ ආණ්ඩුව සමග යළි ඒකාබද්ධ වීම ප්‍රතික්ෂේප කර ඇත.

එක්සත් ජනපදය 2019 සිට, යුද්ධයෙන් විනාශ වූ සිරියාව ප්‍රතිනිර්මාණය කිරීමට උත්සාහ කරන ඕනෑම කෙනෙකුට දඬුවම් කිරීමට විවිධ පනත් උපයෝගී කර ගනිමින් උත්සාහ කරමින් සිටින අතර ජනාධිපති බෂාර් අසාද්ගේ රජයට යුද අපරාධ චෝදනා නගමින් දමස්කස් වෙත ආධාර ලැබීම් අවහිර කරයි.

රුසියානු ජනාධිපති පුටින් ඊයේ(19) කියා සිටියේ එවැනි සම්බාධක “ව්‍යසනකාරී ප්‍රතිඵල” ගෙන දී ඇති බවත් සිරියාවට මානුෂීය ආධාර ලබා දීමේ ක්‍රියාවලිය “දේශපාලනීකරණය නොකළ යුතු” බවත් ය.

ඊයේ(19) ටෙහෙරානයේ පැවති සමුළුව අතරතුර, පුටින් ඉරාන ජනාධිපති ඊබ්‍රාහිම් රයිසි සහ තුර්කියේ රිසෙප් තායිප් එර්ඩෝගන් යන නායක දෙපලද හමුවිය.එහිදී ඒකාබද්ධ ප්‍රකාශයක් කළ ජනාධිපතිවරු තිදෙනා “සිරියානු ගැටුමට මිලිටරි විසඳුමක් තිබිය නොහැක” යන ඔවුන්ගේ ස්ථාවරය තහවුරු කළේ, එක්සත් ජාතීන්ගේ නායකත්වය යටතේ දේශපාලන විසඳුමක් පමණක් ලබා දිය යුතු යන ස්ථාවරය මතු කරමිනි. ඔවුහු සිරියාවේ බරපතල මානුෂීය තත්වය උග්‍ර කරන “ජාත්‍යන්තර නීතිය උල්ලංඝනය කරන ඒකපාර්ශ්වික සම්බාධක” හෙළා දකිමින්, “වෙනස් කොට සැලකීම, දේශපාලනීකරණය සහ පූර්ව කොන්දේසිවලින් තොරව සියලුම සිරියානුවන්ට ආධාර වැඩි කරන ලෙස” එක්සත් ජාතීන් සහ අනෙකුත් ජාත්‍යන්තර සංවිධානවලින් ආයාචනා කර සිටියහ.

IS සහ අනෙකුත් ත්‍රස්තවාදී කණ්ඩායම් පරාජය කිරීමට රුසියාව 2015 සැප්තැම්බර් මාසයේදී ඩැමස්කස් රජයේ ඉල්ලීම පරිදි ගවේෂණ බලකායක් සිරියාවට යැවීය. 2017 ජනවාරි මාසයේදී මොස්කව්, අන්කාරා සහ ටෙහෙරාන බලධාරින්, 2011 වර්ෂයේදී ආරම්භ වූ සිරියාවේ ගැටුම විසඳීම සඳහා කසකස්තානයේ අගනුවර ලෙස නම් කරන ලද “ඇස්තානා ක්‍රියාවලිය” දියත් කළහ.