සිරප් හා දියර ඖෂධ පානයෙන් ඉන්දුනීසියාවේ දරුවන් 100කට ආසන්න සංඛ්‍යාවක් මියගොස් ඇති බව විදෙස් මාධ්‍ය වාර්තා කර තිබේ.

මෙම අවාසනාවන්ත සිදුවීමත් සමග එරට බලධාරීන් සියලුම සිරප් වර්ග සහ දියර ඖෂධ අලෙවිය අත්හිටුවීමට තීරණය කර තිබේ.

ඉන්දුනීසියාවේ දරුවන්ගේ මරණවලට හේතු වූ බවට සැකකෙරෙන ඖෂධය ආනයනය කළ එකක්ද දේශීයව නිපදවූ එකක්ද යන්න තවමත් තොරතුරු අනාවරණය වී නොමැති බව වාර්තා වේ.

ඉන්දුනීසියාවේ සෞඛ්‍ය බලධාරීන් පවසන්නේ ආසාත්මිකතාවලට ලක්වූ දරුවන් 200ක් පමණ වාර්තා වී ඇති බවත්, ඔවුන්ගෙන් වැඩි දෙනෙකු වයස අවුරුදු 5ට අඩු බවත්ය.

මෙම සිදුවීම වාර්තාවන්නේ ගැම්බියාවේ කැස්ස සිරප් වර්ගයක් හේතුවෙන් දරුවන් 70කට ආසන්න ප්‍රමාණයක් මියයාම සිදුවී සති කිහිපයකට පසුව වීම විශේෂත්වයකි.

කෙසේ වෙතත් ගැම්බියාවේ භාවිත කළ ඉන්දියාවේ නිෂ්පාදිත කැස්ස සිරප් වර්ගය ඉන්දුනීසියාවේ භාවිත නොකළ බව එරට බලධාරීහු පවසති.