එක්සත් ජාතීන්ගේ රුසියාවේ නිත්‍ය නියෝජිත වාසිලි නෙබෙන්සියා යුක්රේන ගැටුම රාජ්‍ය තාන්ත්‍රික හෝ මිලිටරි ක්‍රම මගින් අවසන් කළ හැකි නමුත් මොස්කව් සිය අරමුණු සාක්ෂාත් කර ගැනීමෙන් පසුව පමණක් එය සිදුවනු ඇති බව ඊයේ(13) පැවසීය.

එක්සත් ජාතීන්ගේ ආරක්ෂක කවුන්සිලයේ පැවති දැනුවත් කිරීමේ සාකච්ඡාවකදී නියෝජිතයා දෙපාර්ශ්වය අතර සතුරුකම් අවසන් කිරීමට හැකි මාර්ගයක් පිළිබඳව අදහස් දක්වමින් මෙසේ අදහස් ප්‍රකාශ කළේය. ගැටුම සමථයකට පත් කිරීමේ අවස්ථාව “යුක්රේනය රුසියාවට තර්ජනයක් වීම මෙන්ම රුසියානු භාෂාව කතා කරන යුක්රේනියානුවන්ට වෙනස් කොට සැලකීම නැවැත්වූ පසු සිදුවනු ඇත,” ඔහු පැවසීය.

නෙබෙන්සියා සඳහන් කළේ, “මෙම ප්‍රතිඵලය සාකච්ඡා මාර්ගයෙන් ලබා ගත හැකි නම්, අපි ඒ සඳහා සූදානම්ව සිටිමු. එසේ නොවේ නම් – අපගේ කාර්යයන් මිලිටරි මාර්ගයෙන් සාක්ෂාත් කරගනු ඇත” යනුවෙනි.

රුසියාව සටන් කරන්නේ යුක්රේන ජනතාවට එරෙහිව නොව, කියෙව්හි කුමන්ත්‍රණයකින් පසුව “2014 දී බලයට පත් වූ සාපරාධී ජාතිකවාදී තන්ත්‍රයට” එරෙහිව බව රාජ්‍ය තාන්ත්‍රිකයා නැවත අවධාරණය කළේය. නව යුක්රේන නායකත්වය “රුසියාවට සම්බන්ධ සියල්ලෙන් රට පිරිසිදු කිරීමටත්, නාසි සහචරයන් උත්කර්ෂයට නැංවීමටත්” උත්සාහ කරමින් සිටිනවා යැයි අවධාරණය කළේය.

ඩොනෙට්ස්ක් සහ ලුගාන්ස්ක් මහජන සමූහාණ්ඩුවට විශේෂ තත්ත්‍වයක් ලබා දී සාමයට මග පෑදීමේ අරමුණින් 2014 සහ 2015 දී අත්සන් කරන ලද දැන් අභාවයට ගොස් ඇති මින්ස්ක් ගිවිසුම් කියෙව් පරිපාලනය බලාත්මක කළේ නම් “යුක්‍රේනයට සියල්ල වෙනස් ආකාරයකින් අවසන් කළ හැකිව තිබූ බව” නෙබෙන්සියා ප්‍රකාශ කළේය.

කෙසේ වෙතත්, නෙබෙන්සියාට අනුව, යුක්රේන ජනාධිපති ව්ලැඩිමීර් සෙලෙන්ස්කි හෝ ඔහුගේ පූර්වගාමීන් හෝ මින්ස්ක් ගිවිසුම් සාකච්ඡා කිරීමට සහභාගී වූ ප්‍රංශය සහ ජර්මනිය කිසි විටෙකත් ගිවිසුම් ප්‍රකාරව කටයුතු කිරීමට උත්සහා කළේ නැත. මෙම රාජ්‍ය තාන්ත්‍රික ක්‍රියාවලිය “රුසියාවට එරෙහිව යුක්රේනය පිහිටුවීම සඳහා ඔවුන් රහසිගතව යුක්රේනය සන්නද්ධ කළ ආරක්ෂක තිරයක් ලෙස පමණක් සේවය කළේය” යනුවෙන් ඔහු ප්‍රකාශ කළේය.