ලෝකයේ ජාතීන් 03ක් වඳ වීයාමේ තර්ජනයට මුහුණදී සිටින බව විද්‍යාඥයන් අනාවරණය කරගෙන ඇති බවත් ඇස්කිමෝවරු, ඇමෙරිකාවේ රතු ඉන්දියන්වරු හා ලංකාවේ සිංහලයන් ඒ අතර වන බවත්, වර්තමානයේ සමාජයේ ඇති වන සමහර සිද්ධීන් දුටුවිට එම භයංකාර ඉරණම වෙත යන්නේදැයි යන තිගැස්ම ඇති වන බවත්, කථානායක කරු ජයසුරිය මහතා පැවසීය.

කථානායකවරයා මේ බව පැවසූවේ ඊයේ (19දා) අම්පාර ප්‍රදේශයේ පැවති ශ්‍රී ලංකා රාමඤ්ඥ මහ නිකායේ වාර්ෂික උපසම්පදා උත්සවයේ සමාරම්භයට ප්‍රධාන ආරාධිතයා ලෙස එක්වෙමිනි.

එහිදී වැඩිදුරටත් අදහස් දැක්වූ කථානායකවරයා,

“අප විසින් ජනතා සිතුම් පැතුම් යහමගට ගෙන ඒමට ක්‍රියා කිරීමේ කාලය දැන් පැමිණ ඇති බව මගේ හැඟීමයි. සමාජයේ සාරධර්ම විශාල ලෙස පිරිහෙමින් පවතිනවා. මේවා දකින විට අපට ඇතිවන්නේ මහා වේදනාවක්. එදා අප දුටු මිනිස්කම අගයන සමාජය වෙනුවට මුදලට යටවෙන ආත්මාර්ථකාමී සමාජයක් ඇති වෙමින් පවතිනවා. මේ පිරිහීමේ ලකුණු.

මෙහිදී මා කීපවිටක්ම සඳහන් කළ නමුත් අවාසනාවට මාධ්‍යයේ හා ජනතාවගේ අවධානය මෙම බැරෑරුම් කරුණ කෙරෙහි අවධානය යොමු වී නැහැ. ජාතීන් තුනක් ලෝකයෙන් තුරන් වන බවට මීට දශක හතරකට පමණ පෙර ඇමෙරිකාවේ විශ්වවිද්‍යාලයක් මගින් කළ පරීක්ෂණයකදී හෙළි වී තිබෙනවා. එනම් ඇස්කිමෝවරු, ඇමෙරිකාවේ රතු ඉන්දියන්වරු හා ලංකාවේ සිංහලයන් මේ පණිවිඩය තවමත් රටට ගිහින් නැහැ.

මෑත යුගයේදී අපි දකින සිද්ධීන් ගැන හිතන විට සාමාන්‍ය පුද්ගලයෙකුට පවා මෙහි බැරෑරුම්කම වැටහෙනවා. මහා සංඝරත්නය ඇතුළු ආගමික නායකයන් මෙන්ම බුද්ධිමත් ප්‍රජාව වහා ක්‍රියාත්මක නොවුනහොත් ප්‍රතිඵල භයංකාර වෙන්නට පුළුවන්. සහෝදරයන් එක්ව සිය දෙමව්පියන් මරන, කුඩා දරුවන් සිය පවුලේ සාමාජිකයන් විසින්ම දූෂණය වන, දෙමව්පියන් දම්වැල් දමා බැඳ දමන තම කුඩා දරුවන්ට මත්පැන් පොවන සමාජයක්, පටු ජාති, ආගම්වාදී හැඟීම් ඇති කරන එකිනෙකා විනාශ කර ගන්නා ජාතියකට හෝ දේශයකට අනාගතයක් ගැන හිතන්න බැහැ.“ යැයි පැවසීය.