උඩවලව ජලාශයෙන් ජලය ලබාගෙන උඩවලව ජලාශයේ වම් ඇළ හා දකුණු ඇළ අක්කර 65,000ක ප්‍රදේශයක් මේ වන විට වගාකර ඇති බවත්, එම ගොවිතැන්වලට ජලය ලබාගත නොහැකිව ගොවි පවුල් 45,000ක දෙනා මේ මොහොත වන විටත් අනාථ වී ඇති බවත් ජාතික ගොවි ව්‍යාපාරයේ ජාතික සංවිධායක කරුණාතිලක හේරත් මහතා පවසයි.

එම ප්‍රදේශයේ ගොවීන් දිගින් දිගටම මෙම දුක්ගැනවිල්ල කෘෂිකර්ම ඇමැතිවරයාට ඉදිරිපත් කළ ද කෘෂිකර්ම ඇමතිවරයා එයට විසඳුම් දීමට අපොහොසත් වී ඇති බවද, සමනල වැව ජලාශයේ සියයට 17ක පමණ ප්‍රමාණයක් ජලය පවතින හෙයින් උඩවලව ජලාශයට ජලය ලබාදීම කළ හැකි දෙයක් වුවද විදුලි බල ඇමැතිවරයාගේ සහ කෘෂිකර්ම ඇමැතිවරයාගේ කඹ ඇදිල්ල නිසා ගොවි ජනතාව තවත් පීඩාවට පත්වී ඇති බවද ඒ මහතා පෙන්වා දෙයි.

දැන්වත් මෙම ඇමැති කඹ ඇදිල්ල නතර විය යුතු බවත්, ගොවින්ට ජලය ලබාදීම ප්‍රමුඛ කරාණය ලෙස සලකා එය ක්‍රියාත්මක නොකළ හොත් මෙරට සමස්ත ජනතාවටම බඩගින්නේ සිටීමට සිදු වනු ඇති බවත් කරුණාතිලක හේරත් මහතා පෙන්වා දෙයි.

ඔහු මේ බව පැවසුවේ ජාතික ගොවි ව්‍යාපාරය විසින් අද(6) දින පැවැත්වූ මාධ්‍ය හමුවකට එක්වෙමිනි.

වීඩියෝව නරඹන්න…