සේවක අර්ථසාධක අරමුදල් පනත සංශෝධනය කිරීම සඳහා අමාත්‍ය මණ්ඩල අනුමැතිය හිමි වී තිබේ.

ඊට අදාළ යෝජනාව මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා වශයෙන් ජනාධිපති රනිල් වික්‍රමසිංහ විසින් ඉදිරිපත් කරනු ලැබ ඇත.

දේශීය ණය ප්‍රශස්තකරණ වැඩසටන යටතේ සේවක අර්ථසාධක අරමුදල සතු භාණ්ඩාගාර බැඳුම්කර ප්‍රශස්තකරණයට ලක් වීම තුළින් එම අරමුදලේ සාමාජිකයින්ගේ විශ්‍රාමික ගෙවීම් සහ ප්‍රතිලාභවලට බලපෑමක් නොවන අයුරින් එම ගෙවීම් සහ ප්‍රතිලාභ තහවුරු කිරීමේ අවශ්‍යතාව රජය විසින් හඳුනා ගෙන ඇති බව පැවසේ.

ඒ අනුව, ඉකුත් වසර 5ක කාලය තුළ සේවක අර්ථසාධක අරමුදලේ සාමාජිකයින් සඳහා ගෙවනු ලැබ ඇති වාර්ෂික පොළී ප්‍රතිලාභ සැලකිල්ලට ගෙන, 2023-2026 කාලය දක්වා ඉදිරි වසර 4ක කාලය තුළ දායකත්ව මුදල් මත හිමි වන වාර්ෂික පොළී අනුපාතය අවම වශයෙන් 9%ක් විය යුතු බවට නියම කෙරෙන පරිදි 1958 අංක 15 දරන සේවක අර්ථසාධක අරමුදල් පනත සංශෝධනය කිරීම සඳහා මෙලෙස අමාත්‍ය මණ්ඩල අනුමැතිය ලැබී ඇත.