ශ‍්‍රී ලංකා නිදහස් පක්ෂය තුළ සිටිමින් ඒකාබද්ධ විපක්ෂය හා සම්බන්ධ වී කටයුතු කිරීමට පාර්ලිමේන්තු මන්ත‍්‍රී එස්. බී. දිසානායක තීරණය කර තිබේ.

ඩබ්ලිව්. ඞී. ජේ. සෙනෙවිරත්න සහ සුසිල් පේ‍්‍රමජයන්ත් යන මන්ත‍්‍රීවරුන්ට මෙන්ම තමාටද ඒකාබද්ධ විපක්ෂයේ මීළග රැස්වීමට ආරාධනා කිරීමට එහි පක්ෂ නායකයින් ඊයේ (24)තීරණය කර ඇති බැවින් මෙම තීරනය ගත් බව දිසානායක මහතා පවසයි.

මේ අතර ඒකාබද්ධ පොදුජන පෙරමුණ නමින් පිහිටුවන නව සන්ධානය සම්බන්ධයෙන් ද මෙහිදී දීර්ඝ වශයෙන් සාකච්ඡා කර ඇති බව දේශපාලන ආරංචි මාර්ග සඳහන් කරයි. පොහොට්ටුව ලකුණ යටතේම ඉදිරියටත් මැතිවරණ සඳහා තරග වැදීමට ද එහිදී අවසන් එකඟතාවකට පැමිණ තිබෙන බව එම ආරංදිමාර්ග වැඩිදුරටත් සදහන් කරයි.

මෙම නව සන්ධානය සඳහා දේශපාලන පක්ෂ 20කට ආසන්න සංඛ්‍යාවක් ඇතුළත් වන අතර එහි තනතුරු බෙදාදීම සම්බන්ධයෙන් ද ඊයේ දීර්ඝ වශයෙන් සාකච්ඡා කළ බවයි වාර්තා වෙයි.

ඉදිරි පළාත් සභා මැතිවරණය සම්බන්ධයෙන් ද එහි දී සාකච්ඡා කර ඇති අතර අපොස උසස් පෙළ විභාගය පැවැත්වීම හේතුවෙන් අගෝස්තු 17 වැනිදා පැවැත්වීමට නියමිතව තිබූ විරෝධතාව සැප්තැම්බර් 05 වැනිදා දක්වා කල් දැමීමට ඊයේ රැස්වූ ඒකාබද්ධ විපක්ෂයේ පක්ෂ නායකයින් තීරණය කර ඇත.