මහ කන්නයේ වී වගා කටයුතු ඔක්තෝබර් 15 දින හෝ ඊට ආසන්න දිනයක් තුළ ආරම්භ කිරීමට සියලු අංශ එකඟතාව පළ කර ඇති බව වාර්තා වේ.

ඒ සඳහා ගොවීන් උනන්දු කළ යුතු යැයි කෘෂිකර්ම ක්ෂේත්‍රයට අදාළ සියලු ම අංශ තීරණය කර ඇත.

2023/24 මහ කන්නය හා 2024 යල කන්නය තීරණාත්මක වගා කන්න දෙකක් වන බවත්, දැනට ක්‍රියාත්මකව පවතින එල් නිනෝ ක්‍රියාවලිය හේතුවෙන් මෙවර මහ කන්නයේ ඔක්තෝබර් හා නොවැම්බර් මාසවල විශාල වර්ෂාපතනයක් ලැබීමට හැකියාවත් ඇති බවත්, මීළඟ යල කන්නය නැවත වරක් වියළි කාලගුණික තත්ත්වයක් උද්ගත විය හැකි බවත් මෙරට මෙන්ම විදේශීය කාලගුණික අංශද අවධාරණය කර තිබේ.

එම නිසා වර්ෂාවෙන් ලැබෙන ජලය අපතේ යා නොදී මනාව කළමනාකරණය කර ගැනීමේ වැඩපිළිවෙළක් සියලු අංශවල දායකත්වයෙන් ක්‍රියාත්මක කළ යුතුව ඇතැයි ද වගකිවයුතු අංශ පෙන්වා දෙති.