ඒකාබද්ධ විපක්ෂයේ මන්ත්‍රීවරුන්ට පාර්ලිමේන්තුවේ කතා කිරීමට ලැබෙන කාලය ප්‍රමාණවත් නොවන නිසා ඒ පිළිබඳ කථානායක කරු ජයසූරිය මහතාට හා ජිනීවා මානව හිමිකම් කොමිසමට පැමිණිලි කරන බව හිටපු නියෝජ්‍ය කථානායක තිලංග සුමතිපාල මහතා සඳහන් කළේය.

ලබන සතියේදී මෙම පැමිණිලි ඉදිරිපත් කරන බවත්, ලැබෙන කාලය ප්‍රමාණවත් නොවීම පිළිබඳ මේ වනවිට ලෝක පාර්ලිමේන්තු සංසදයේ සභාපති Gabrieia Cueves Barron මහත්මියට වාර්තාවක් ලබාදුන් බවත් ඔහු පවසා සිටියේය.

පාර්ලිමේන්තුවේ අවස්ථාව හිමිවීම යටතේ මන්ත්‍රීවරුන් 70ක් සිටින ඒකාබද්ධ කණ්ඩායමට හිමි වන්නේ 15%ක් බවත්, එහෙත් ආණ්ඩුවේ සිටින ශ්‍රී ලංකා නිදහස් පක්ෂ මන්ත්‍රීවරුන් 23 දෙනාට 15%ක්,සාමාජිකයන් 16ක් සිටින ටී.එන්.ඒ.සංවිධානයට 15%ක්, මන්ත්‍රීවරුන් 06ක් සිටින ජනතා විමුක්ති පෙරමුණට 15%ක් සහ මන්ත්‍රීවරුන් 106ක් සිටින එක්සත් ජාතික පෙරමුණට 40%ක් හිමිව තිබෙන බවද ඒ මහතා කියා සිටියේය.

මේ නිසා මන්ත්‍රීවරුන් 70ක් සිටින ඒකාබද්ධ විපක්ෂයට පාර්ලිමේන්තු කතා කාලවලින් 30%ක් හිමි විය යුතු බවද හෙතෙම සඳහන් කළේ ඊයේ (26) පැවැති මාධ්‍ය සාකච්ඡාවකදීය.