මල්වතු, අස්ගිරි උභය පාර්ශ්වයට අයත් භික්‍ෂූන් වහන්සේ, මල්වතු – අස්ගිරි මහා නාහිමිවරුන් බැහැ දැක, භික්‍ෂු කථිකාවත් ලියාපදිංචි කිරීමේ පනත සම්බන්ධයෙන් අද (01) දැනුවත් කළේය.

එහිදී අදහස් දැක්වූ පූජ්‍ය මැදගොඩ අභයතිස්ස හිමියන් පෙන්වා දුන්නේ “යෝජිත භික්ෂූ කථිකාවත් ලියාපදිංචි කිරීමේ පනතින් කූඨ ආකාරයට මහා සංඝරත්නය රාජ්‍ය නීති යාන්ත්‍රණයට යටත් කිරීම සඳහා සිදු කරනු ලබන්නක් බවත් ඒ හරහා භික්ෂූන් වහන්සේලා අතර විශාල භේද බින්නතා ඇති කිරීමටත් ඒ තුළින් ශාසනය සී සීකඩ යවන්නට කටයුතු කරන්නක්. බුද්ධ නීතියට නැතහොත් විනයට භීක්ෂූන් වහන්සේලා යටත් වෙනවා. ඒ වගේම රටේ නීතියට..අපරාධ නීතියට භීක්ෂූන් වහන්සේලා යටත් වෙනවා. හැබැයි මේ දෙක හැරෙන්නට සම්ප්‍රදාය නීතියක් කිරීම හරහා ශාසනය තුළ ප්‍රශ්න රැසක් ඇති වෙනවා.” යනුවෙනි.

මල්වතු අස්ගිරි මහනාහිමිවරුන් ප්‍රමුඛ කාරක සංඝ සභාවන්හි අනුමැතිය නොමැතිව රජයට කිසිසේත් මෙය අනුමත කිරීමට නොහැකි බවත් අභයතිස්ස හිමියෝ කීහ. අස්ගිරි පාර්ශවයේ ලේඛකාධිකාරී පූජ්‍ය මැදගම ධම්මානන්ද හිමියන් පවසා සිටියේ කථිකාවත් ලියාපදිංචි කිරීමේ පනත් කෙටුම්පත සම්බන්ධයෙන් අස්ගිරි කාරක සංඝ සභාව රැස්වී ඉදිරි දිනකදී සාකච්ඡා කිරීමට නියමිත බවය.