පාර්ලිමේන්තු රැස්වීම අවසන් වීමට නියමිතව තිබූ පස්වරු 6.30ට පෙර කාලය දීර්ඝ කරගැනීමට නොහැකි වීම නිසා, සාපරාධී කාරණාවලදී අනේ‍යාන්‍ය සහයෝගීතාව දැක්වීමේ (සංශෝධන) පනත් කෙටුම්පත සම්මත කරගැනීමට ආණ්ඩුවට ඊයේ (07දා) නොහැකිවිය.

පස්වරු 6.25ට මූලාසනයේ සිටි නියෝජ්‍ය කථානායකවරයා පනත පිළිබඳ කටයුතු අවසන් කිරීම සඳහා කාලය දීර්ඝ කිරීමට යෝජනා කරන ලෙස සභාවට දැනුම්දුන් අවස්ථාවේ ඒකාබද්ධ විපක්ෂයේ මන්ත්‍රිවරුන් ඒ සඳහා ඡන්දයක් ඉල්ලා සිටීම නිසා මෙම තත්ත්වය උද්ගත විය.

ඒකාබද්ධ විපක්ෂයේ මන්ත්‍රිවරුන්ගේ ඝෝෂාව මැද්දේ පස්වරු 6.30ට සභාව කල් තැබූ නියෝජ්‍ය කථානායක ආනන්ද කුමාරසිරි කල්තැබීමේ යෝජනාව ඉදිරිපත් කරන ලෙස ශ්‍රී ස්කන්ධරාසා මන්ත්‍රිවරියට දැනුම් දුන් අවස්ථාවේ එම යෝජනාව ඉදිරිපත් කළ නොහැකි බව රීති ප්‍රශ්නයක් ඉදිරිපත් කරමින් විමල් වීරවංශ මන්ත්‍රිවරයා කියා සිටියේය.

ඒකාබද්ධ විපක්ෂයේ මන්ත්‍රිවරුන් සභා ගැබ මැදට පැමිණ විරෝධය පළ කරද්දී නියෝජ්‍ය කථානායකවරයා සභාවේ කටයුතු අවසන් බව ප්‍රකාශ කර මූලාසනයෙන් ඉවත්ව යද්දී වේත්‍රධාරි අනිල් පරාක්‍රම සමරසේකර සෙංකෝලය රැගෙන සභා ගැබෙන් පිටතට ගියේය.