එළැඹෙන 5දා හා 6දා පාර්ලිමේන්තුව කල්තැබීමක් පිළිබඳව කථානායක කරු ජයසූරිය මහතාට කිසිම පාර්ශ්වයකින් උපදෙස් ලැබී නැතැයි කථානායක මාධ්‍ය ඒකකය පවසයි.

ජනාධිපතිතු මෛත්‍රීපාල සිරිසේන මහතාගෙන් හෝ වෙනත් කිසිම පාර්ශ්වයකින් එවැනි උපදෙස් ලැබි නැති බවත් පක්ෂ නායක රැස්වීමේදී හෝ වෙනත් කිසියම් ස්ථානයකදීවත් එවන් උපදෙස් නොලැබුණ බව කථානායක මාධ්‍ය ඒකකය පවසයි.

අදාළ දිනයන්හි පාර්ලිමේන්තුව කල්තැබීමේ කිසිදු අවශ්‍යතාවයක් පැනනැගී නොමැති බවද කථානායක මාධ්‍ය ඒකකය පවසයි.

කථානායක මාධ්‍ය අංශය විසින් නිකුත් කරන ලද නිවේදනයක් මෙහි දැක්වෙයි.

2018 සැප්තැම්බර් මස 5 සහ 6 දිනයන්හි පාර්ලිමේන්තුව කල්තැබීමක් පිළිබඳව තමා වෙත උපදෙස් ලැබී ඇතැයි ගරු කථානායකතුමන් පැවසූ බවට 2018.09.02 ඉරු දින ඇතැම් ජාතික පුවත්පත් වල දේශපාලන තීරු ලිපියේ සඳහන් වූ තොරතුර මුළුමනින්ම සාවද්‍ය බව අවධාරණය කරමු.

එමෙන්ම, ගරු ජනාධිපතිතුමන් හෝ වෙනත් කිසියම් පාර්ශවයක් ගරු කථානායකතුමන්ට එවන් උපදෙස් ලබා දීමක් සිදු කර නොමැත.

පක්ෂ නායක රැස්වීමේදී හෝ වෙනත් කිසියම් ස්ථානයකදී තමාට එවන් උපදෙස් ලැබී ඇති බවට ගරු කථානායකතුමන් කිසිදු ප්‍රකාශයක් ද කර නොමැත.

එමෙන්ම, අදාල දිනයන්හි පාර්ලිමේන්තුව කල්තැබීමේ කිසිදු අවශ්‍යතාවයක් පැනනැගී නොමැති බවද අවධාරණය කරමු.

– කථානායක මාධ්‍ය අංශය