GPS තාක්ෂණය යොදා ගනිමින් අන්තර් පළාත් බස් රථ නියාමනය සඳහා ජාතික ගමනා ගමන කොමිසම වැය කළ රුපියල් මිලියන 116ක මුදලකින් නිසි ප්‍රතිඵල ලබා ගැනීමට නොහැකි වී ඇතැයි වාර්තාවේ.

කෝප් කමිටුවේ විමර්ශනයේදී හෙළිවූ ආකාරයට මෙම ව්‍යාපෘතියේ යටිතල පහසුකම් සඳහා ජාතික ගමනා ගමන කොමිසම රුපියල් මිලියන 116ක් වැය කොට ඇත.
මෙම නියාමන ව්‍යාපෘතියේ පාලන මැදිරි ගොඩනැගිල්ලක කොටසක් අලුත්වැඩියාවට රුපියල් මිලියන 20ක් සහ එහි තාක්ෂණ ජාලය වැඩි දියුණු කිරීම සඳහා රුපියල් මිලියන 17ක් වැය කොට තිබේ.
එහෙත් එම පාලන මැදිරිය භාවිතයට ගෙන නැත.
එසේම බස් රථවල GPS උපකරණ 1307ක් සවිකිරීම සඳහා රුපියල් මිලියන 79ක් වැය කර ඇත.
නමුත් බොහොමයක් බස් රථවල එම උපකරණ නිසි ලෙස ක්‍රියාත්මක නොවීම නිසා ඒ සඳහා වැයකළ මුදල අපතේ ගොස් තිබේ.