ඒකාබද්ධ විපක්ෂය විසින් කොළඹදී පවත්වන ලද ජන බල විරෝධතාවය ඉතමෙ සාර්ථක ලෙස පැවැත්වූ බව පාර්ලිමේන්තු මන්ත‍්‍රී නාමල් රාජපක්‍ෂ මහතා පවසයි.ඊයේ (06) පැවති මාධ්‍ය හමුවකට එක්වෙමින් ඔහු මේ බව කියා සිටියේය.

‘‘අපි සාමකාමී උද්ඝෝෂණයක් පැවැත්වූවා. හැබැයි පොලිසිය එතැනින් නතර වුණේ නැහැ. උදෑසනම අපේ බස් රථවලට ගහන්න පටන් ගත්තා. ජනතාව බය කරන්න උත්සාහ කළා. හැබැයි කිසිවක් නොතකා ලක්ෂ සංඛ්‍යාත ජනතාවක් කොළඹට ආවා.

රනිල් වික්‍රමසිංහ මහතා අගමැති ලෙස සිටින කාලයේ ඔහුගේ ක්‍රමවේදය තමයි මෙවැනි ජන රැලියක් පවත්වලා මිනිහෙක් දෙන්නෙක් මරාගන්න එක. අපි පුන පුනා කිව්වා අපි කොළඹට එන්නේ සාමකාමී සත්‍යක්‍රියාවකට කියලා.

කොළඹ මහ නගර සීමාව කියන්නේ එජාපයේ හදවත. අපි ආවේ එජාපයේ හදවතට. මේ රටේ ජනතාව බය නැතිව මොන බලපෑම ආණ්ඩුවෙන් ආවත් කොළඹට ආවා.
ශ්‍රී ලනිප සම්මේලනය තිබුණද නැද්ද කියලවත් කවුරුත් දන්නේ නැහැ. අද එජාපයේ සම්මේලනය සිරිකොතේ තියෙනවා. කාමරේකට සීමා වෙලා. ඒ කියන්නේ ආණ්ඩුව කරවන පක්ෂ දෙකම අද බංකොළොත් භාවයට පත්වෙලා තිබෙන්නේ.

අපි මේවා කරන්නේ අධිකරණයෙන් බේරෙන්න කියලා සමහරු කියනවා. හැබැයි අපට එහෙම අධිකරණය පොලිසිය මඟහරින්න කිසිම වුවමනාවක් නැහැ‘‘