පසුගිය වසර දෙකක කාලය තුළ ඇමරිකානුවන් මිලියන 126ක් රුසියාවෙන් පළ කළ ෆේස්බුක් සටහන් වෙත ප්‍රවේශ වී ඇතැයි ෆේස්බුක් සමාගම පවසයි. 2015 ජුනි මාසයේ සිට 2017 අගෝස්තු මාසය දක්වා වන කාලය තුළ මෙවැනි සටහන් 80,000ක් රුසියාවේ සමාගමක් විසින් ෆේස්බුක් වෙබ් අඩවියට එක් කර ඇත.
මේ අතරින් බොහෝ ඒවා සමාජ සහ දේශපාලන පණිවුඩ රැගත් ඒවාය. මෙම පණිවිඩ සියල්ල ෆේස්බුක් වෙත එක් කර ඇත්තේ ක්‍රෙම්ලිනයට සම්බන්ධ රුසියානු සමාගමක් විසින් බව ෆේස්බුක් සමාගම පවසයි. ෆේස්බුක් සමාගම මෙම අනාවරණය සිදු කළේ ෆේස්බුක් ඇතුළු සමාජ ජාල වෙබ් අඩවි තුළ රුසියානු බලපෑම සම්බන්ධයෙන් සොයා බලන ඇමරිකාන සෙනෙට් කමිටුව රැස්වීමට නියමිතව ඇති මොහොතකය.
ඩොනල්ඩ් ට්‍රම්ප්ට වාසි සහගත වන ලෙස රුසියාව ෆේස්බුක් හා අනෙකුත් සමාජ මාධ්‍ය ජාල ඔස්සේ ප්‍රචාරණ ව්‍යාපෘතියක් දියත් කළ බවට චෝදනා එල්ල වී තිබේ. රුසියාව මෙම චෝදනා ප්‍රතික්ෂේප කරයි.