ශ්‍රී ලංකා නිදහස් පක්ෂය ප්‍රමුඛ එක්සත් ජනතා නිදහස් සන්ධානය සම්මුති ආණ්ඩුවෙන් ඉවත්විය යුතු බවට පක්ෂයේ මධ්‍යම කාරක සභාවට ඉදිරිපත් කරන ලද යෝජනාව වහා ක්‍රියාත්මක කරන්නැයි ආණ්ඩුවෙන් ඉවත්වූ ශ්‍රීලනිප 15දෙනාගේ කණ්ඩායම ජනාධිපති මෛත්‍රිපාල සිරිසේන මහතාගෙන් හෙට (13) ලිඛිතව ඉල්ලීමක් කරන බව එම කණ්ඩායමේ ජ්‍යෙෂ්ඨ මන්ත්‍රීවරයෙක් පැවසීය.

ඊට අදාළ ලිපිය සුසිල් ප්‍රේමජයන්ත, අනුර ප්‍රියදර්ශන සහ ලක්ෂ්මන් යාපා අබේවර්ධන යන මහත්වරුන් විසින් අද (12) සකස් කරනු ලැබූ බවත්, ආණ්ඩුවෙන් ඉවත් වූ මන්ත්‍රීවරුන් 15 දෙනාගේ අත්සනින් යුතු වූ ලිපිය ජනාධිපතිවරයාට යවන බවත් ඔහු සඳහන් කළේය.

ශ්‍රී ලංකා නිදහස් පක්ෂය ප්‍රමුඛ එක්සත් ජනතා නිදහස් සන්ධානය ආණ්ඩුවේ තවදුරටත් රැඳී සිටීමෙන් පක්ෂයත්, සන්ධානයත් විනාශ වන බැවින් ආණ්ඩුවෙන් ඉවත්ව ප්‍රගතශීලී බලවේග සමඟ නව ආණ්ඩුවක් පිහිටුවිය යුතු බව දන්වමින් මෙම ලිපිය සකස් කර ඇතැයි ද එම මන්ත්‍රීවරයා පැවසීය.

ශ්‍රී ලංකා නිදහස් පක්ෂය ප්‍රමුඛ සන්ධාන ආණ්ඩුවෙන් ඉවත් විය යුතු බව පවසමින් තම කණ්ඩායම මීට පෙර පැවැති පක්ෂ මධ්‍යම කාරක සභාවට යෝජනාවක් ඉදිරිපත් කර ඇතැයි කී එම මන්ත්‍රීවරයා එය ලබන 16 වැනි දා පැවැත්වෙන පක්ෂයේ මධ්‍යම කාරක සභාවේදී අනුමත කර වහාම ආණ්ඩුවෙන් ඉවත්විය යුතු යැයි කියා සිටියේය.

ජනාධිපතිවරයා වෙත යවන ලිපිය ලබන 16 වැනි දා පැවැත්වෙන පක්ෂයේ මධ්‍යම කාරක සභාවට ද ඉදිරිපත් කරන්නැයි ජනාධිපතිවරයාගෙන් ඉල්ලා ඇතැයි ද හෙතෙම පැවසීය.