මේ දිනවල අමු තේ දලු කිලෝවක් සඳහා ලැබෙන මිල රුපියල් 90කට ආසන්න මිලකට ඉහළ යෑමත් තේ වගාව සඳහා යොදන පොහොර වර්ගවල මිල පහත දැමීමත් සමඟ තේ දල්ලට හොඳ කලක් උදාවී ඇතැයි බළන්ගොඩ ප්‍රදේශයේ තේ ගොවීහු පවසති.

මේ දිනවල අමු තේ දලු කිලෝවක මිල රුපියල් 90කට ආසන්න මිලකට ඉහළ ගොස් ඇති බව තේ ගොවීහු කියති. ඉකුත් මාසවල අමු තේ දලු කිලෝවක මිල රුපියල් 70-75ක් අතර මිලකට පහත බැස තිබූ බව තේ ගොවීහු සඳහන් කරති.

එමෙන්ම තේ වගාව සඳහා යොදන කිලෝ 50ක පොහොර බෑගයක මිල ඉකුත්දා රජය මඟින් රුපියල් 1000 දක්වා අඩු කිරීමත් සමඟ තේ වගාවට පොහොර යෙදීම සඳහා යන වියදම විශාල වශයෙන් අඩුවීම විශාල වාසියක් බව ඔවුහු කියති. තේ වගාව සඳහා යොදන කිලෝ 50ක පොහොර බෑගයක මිල වෙළෙඳපොළේ ඉකුත් වසර කිහිපයකම පැවැතියේ රුපියල් 2800-3000ත් අතර ඉතා ඉහළ මිලකටයි.

ඒත් මේ දිනවල එය වෙළෙ¼දපොළේ රුපියල් 1000කට පවතී. ඉකුත් වසරවල තේ වගාව සඳහා යොදන පොහොර මිල ඉහළ යෑමත් අමු තේ දලු මිල පහළ වැටීමත් සමඟ බළන්ගොඩ ප්‍රදේශයේ ජනතාවට තේ වගාව එපා වී තිබුණු බව ගොවීහු පවසති. ඒත් මේ දිනවල ප්‍රදේශයේ ගොවීන් විශාල වශයෙන් අතහැර දමා තිබූ තේ වගාවන් නැවත එළිපෙහෙළි කර තේ වගාවට නැවත යොමුවන බවද වාර්තා වේ.