ශ්‍රී ලංකාවේ මෙතෙක් නිම වූ විශාලතම බහුකාර්ය සංවර්ධන ව්‍යාපෘතියක් වන මොරගහකන්ද ජලාශ ව්‍යාපෘතිය මීට සුළු මොහොතකට පෙර ජනතා අයිතියට පත් කෙරිණ. ඒ ජනාධිපති මෛත්‍රීපාල සිරිසේන මහතාගේ ප්‍රධානත්වයෙනි.

මහින්ද රාජපක්ෂ පාලන සමයේ එවක කෘෂිකර්ම අමාත්‍ය පදවිය හෙබවූ මෛත්‍රීපාල සිරිසේන මහතාගේ යෝජනාවකට අනුව 2007වසරේ ජනවාරි 25වන දා වැඩ ආරම්භ කරන ලද මෙම ව්‍යාපෘතිය විවිධ හේතූන් මත ප්‍රමාද කෙරිණ. එහෙත් ජනාධිපති මෛත්‍රීපාල සිරිසේන මහතා බලයට පත්වීමත් සමග නැවත වැඩ ඇරඹූ මෙය කඩිනමින් නිමාවට පත්කකෙරිණ. කොන්ක්‍රීට් වේල්ලක්, පස් වේල්ලක් සහ කළු ගල්පිරවූ වේල්ලක් යන ‍වේලි තුනකින් යුත් මෙරට එකම ජලාශය ද මෙය වේ.

මින්, අක්කර ලක්ෂ 3ක් අලුතින් අස්වද්දා ලක්ෂ 15කට අධික පිරිසකට සෙත සැලසෙන අතර ලක්ෂ 3කට පිරිසිදු පානීය ජලය සැපයේ. මෙය ශ්‍රී ලංකාවේ පළාත් කිහිපයක ව්‍යාප්ත වකුගඩු රෝගය අවම කිරීමට ද හේතුවන බව විද්‍යාඥයෝ අනුමාන කරති. ජලාශයේ සම්පූර්ණ ජල ධාරිතාව අක්කර අඩි හය ලක්ෂ හැට දහසකි. එය පරාක්‍රම සමුද්‍රයේ ජල ධාරිතාව මෙන් 6ගුණයක් යැයි කියනු ලැබේ.

මොරගහකන්ද සහ ඊට සම්බන්ධ කළුගඟ ව්‍යාපෘතිය යටතේ මධ්‍යම, උතුරු මැද, වයඹ, හා නැගෙනහිර පළාත්වල ලොකු කුඩා වැව් 2000කට දියවර සැපයෙනු ඇත. මෙම ජලාශයෙන් ජාතික විදුලිබල පද්ධතියට එක්කෙරෙන විදුලි ධාරිතාව මෙගාවොට් 25 කි.

මේ අතර අගනුවර රථ වාහන තදබදයට සැලකිය යුතු විසදුමක් ගෙන එනු ඇතැයි සැලකෙන රාජගිරියේ ගුවන් පාලමද අද (08) පෙරවරුවේ ජනතා අයිතිය පැවරින.