ඉන්දීය මහ මැතිවරණයේ ප‍්‍රතිඵල අද (23 දා) නිකුත් කිරීමට නියමිතය.

මෙවර පැවැත්වුණේ ඉන්දීය ඉතිහාසයේ 17 වැනි මහ මැතිවරණය වන අතර ඒ සඳහා ඡන්ද දායකයින් 67%ක් සිය ඡුන්දය භාවිත කර ඇත.

මැරතන් ක‍්‍රමයට පැවැත්වෙන මහ මැතිවරණයක් ලෙස සැලකෙන මෙහි ඡන්ද විමසීම අපේ‍්‍රල් 11 වැනිදා සිට මැයි මස 19 වැනිදා තෙක් කොටස් හතකින් පැවැත්විණි. එම කාලය තුළ ප‍්‍රාන්තයෙන් ප‍්‍රාන්තයට වෙන වෙන ම ඡන්ද විමසීම පැවැත්වෙනුයේ, ඉන්දියාව විශාල රටක් මෙන්ම විශාල ජනගහනයක් වෙසෙන රටක් වන හෙයිනි.

මෙවර මහ මැතිවරණය සඳහා මිලියන 900කට අධික ඉන්දියානුවන් පිරිසක් ඡන්ද දායකයින් ලෙස ලියාපදිංචි වී සිටි අතර ඔවුහු ලෝක් සභාවේ ආසන 543 ක් වෙනුවෙන් සිය නියෝජිතයින් පත් කර ගැනීම සඳහා ඡන්දය භාවිත කළහ. පාලන බලය හිමි කර ගැනීම සඳහා එක් පක්ෂයක් ආසන 272 ක් හිමි කර ගත යුතුය.