කලාපීය තත්ත්වය සහ ද්විපාර්ශවීය කරුණු සම්බන්ධයෙන් සාකච්ඡා කිරීම සඳහා පාකිස්තානු අග්‍රාමාත්‍ය ඉම්රාන් ඛාන් මහතා, චීන ජනාධිපති ෂී ජින්පින්ග් මහතා හමුවිය.

චීනයේ සංචාරයක නිරත වී සිටින පාකිස්තාන අග්‍රාමාත්‍යවරයා චීන ජනාධිපතිවරයා හමු වී දෙරටට ප්‍රතිලාභ අත් කරදෙන කරුණු රැසක් සම්බන්ධයෙන් සාකච්ඡා පැවැත්වූ බව ‘රේඩියෝ පාකිස්තාන’ පුවත් සේවය වාර්තා කර තිබිණි.

චීන විදේශ කටයුතු අමාත්‍යාංශය නිකුත් කළ නිවේදනයට අනුව චීන ජනාධිපතිවරයා සහ පාකිස්තාන අග්‍රාමාත්‍යවරයා පැයකට ආසන්න කාලයක් සාකච්ඡා පවත්වා ඇති අතර චීන ජනාධිපතිවරයා ගෞරව කිරීමක් වශයෙන් අගමැති ඉම්රාන් ඛාන්ට දිවා භෝජනා සංග්‍රහයක් ද පවත්වා ඇත.

පාකිස්තාන අග්‍රාමාත්‍ය ඉම්රාන් ඛාන් සමඟ එරට විදේශ කටයුතු අමාත්‍ය ෂහ් මහ්මූද් කුරේෂි ඇතුළු අමාත්‍යවරුන් කිහිපදෙනකු සහ නිලධාරීන් ඇතුළු පිරිසක් මෙම චීන සංචාරයට එක්වූහ. හමුදාවේ ප්‍රධානීන් කිහිපදෙනකු ද ඊට එක්ව සිටි බව චීන විදේශ කටයුතු අමාත්‍යාංශය නිකුත් කළ නිවේදනයේ දැක්විණි.

කාශ්මීර අර්බුදය සම්බන්ධයෙන් දිගින් දිගටම ස්ථාවර මතයක සිටීම සම්බන්ධයෙන් අගමැති ඉම්රාන් ඛාන් චීන ජනාධිපති ෂී ජින්පින්ග් සහ චීන ආණ්ඩුවට කෘතඥතාව පළ කළ බව පාකිස්තාන අගමැති කාර්යාලය නිකුත් කළ නිවේදනයක දැක්විණි. එක්සත් ජාතීන්ගේ මහ මණ්ඩල සැසියේදීද චීන විදේශ කටයුතු අමාත්‍ය වැන්ග් යී කාශ්මීර අර්බුදය සම්බන්ධයෙන් අදහස් දැක්වූ අතර පාකිස්තානයට වැඩි පක්ෂපාතීත්වයක් දක්වමින් හෙතෙම අදහස් දැක්වීය.

චීනය සෑම දුෂ්කර අවස්ථාවකදීම පාකිස්තානයට සහාය දැක්වූ බව ද අගමැති ඉම්රාන් ඛාන් මෙහිදි පවසා ඇත.

‘ඩෝන් ඇසුරිනි’