සති කිහිපයක් පුරා පැවැත්වුණු විරෝධතා වලින් පසුව ඉරාක අගමැකි අඩෙල් අබ්දුල් මහීද් සිය තනතුරින් ඉල්ලා අස්වන බවට නිවේදනය කර ඇත.

නව රජයක් තෝරා ගැනීමට නීති සම්පාදකයින්ට ඉඩ දීම සඳහා තමාගේ ඉල්ලා අස්වීම පාර්ලිමේන්තුවට ඉදිරිපත් කළ බව අගමැතිවරයා පවසයි.

ඉරාකයේ ඉහළම ශියා මුස්ලිම් පූජකවරයා වන ග්‍රෑන්ඩ් අයතුල්ලා අලි අල් සිස්තානි විසින් නායකත්වය වෙනස් කරන ලෙස කළ ඉල්ලීමට ප්‍රතිචාරයක් ලෙස අගමැතිවරයා මෙම තීරණයට එළඹි බව ඔහුගේ කාර්යාලය නිවේදනය කර ඇත.

අස්වන දිනයක් සම්බන්ධව නිවේදනයේ සඳහන් කර නොමැති අතර ඉරාක පාර්ලිමේන්තුව ඉරිදා (01) රැස්වීමට නියමිතව ඇතැයි සඳහන් වේ.

විරෝධතාවයේ යෙදුන පුද්ගලයින්ට ආරක්ෂක අංශ විසින් වෙඩි තැබීම හේතුවෙන් සාමකාමී පෙළපාලිකරුවන් 400ක් පමණ ඝාතනය කර ඇති අතර ඉරාකය පුරා දරුණු ලෙස ප්‍රචණ්ඩත්වය උත්සන්න වී තිබේ.

(රොයිටර් පුවත් ඇසුරිණි – 085)