වසර 24 කට පසුව පාර්ලිමේන්තු ස්ථාවර නියෝග සංශෝදනය කිරීම සහ පාර්ලිමේන්තුවට ඉදිරිපත් කළ මන්ත්‍රී ආචාර ධර්ම පද්ධතිය පිලිබද විවාදය අද (2018-02-19)පෙරවරුවේ ආරම්භ විය.

මෙය මෙරට පාර්ලිමේන්තු ඉතිහාසයේ සුවිශේෂී වැදගත්කමින් යුත් අවස්ථාවක් ලෙස සනිටුහන් වනු ඇති බව කථානායකවරයා සඳහන් කළේය.

යල් පැන යමින් තිබූ පාර්ලිමේන්තුවේ ස්ථාවර නියෝග වසර 24 කට පසුව සංශෝධනය කිරීම පාර්ලිමේන්තු ප්‍රජාතන්ත්‍රවාදය බලගැන්වීමක් බවත්, එමෙන්ම දිගුකලක් පුරා කතාබහට ලක් වූ මන්ත්‍රී ආචාරධර්ම පද්ධතිය පාර්ලිමේන්තුව තුලින්ම යථාර්ථයක් බවට පත් කිරීමට හැකිවීම අනාගතයේ යහපත් දේශපාලන සංස්කෘතියක් බිහි කිරීමට මඟ පාදනු ඇති බවත් පක්ෂ විපක්ෂ මන්ත්‍රීවරුන් අදහස් දක්වමින් කියා සිටියහ.

කථානායක ධූරයට පත් වූ දින සිටම මේ සඳහා පුරෝගාමීව කටයුතු කළ කථානායක කරු ජයසූරිය මහතා මෙම සුවිශේෂ ප්‍රතිසංස්කරණයන් වෙනුවෙන් පෙරමුණ ගැනීම රට තුල යහපත් දේශපාලන සංස්කෘතියක් බිහි කිරීමට ගත් වැදගත් පියවරක් බවත් මන්ත්‍රීවරු සඳහන් කළහ.

කථානායක මාධ්‍ය ඒකකය