අමෙරිකාවේ සෙනට් සභාව නෝර්ඩ් ස්ට්‍රීම් 2 ව්‍යාපෘතිය නැවැත්වීමේ අවසාන ප්‍රයත්නය ලෙස 2020 ජාතික ආරක්ෂක අධිකාරී පනත සම්මත කරගෙන ඇත. පනතට පක්ෂව ඡන්ද 86ක්ද විපක්ෂව ඡන්ද 8ක්ද ලැබුනු අතර සෙනෙට් සභිකයන් හය දෙනෙකු ඡන්ද ප්‍රකාශ කිරීමෙන් වැලකී සිටියහ.මෙම පනත මගින් නෝර්ඩ් ස්ට්‍රීම් 2 ව්‍යාපෘතියට සම්බන්ධවී සිටින ඉදිකිරීම් සමාගම් ඇතුලු විවිධ සේවා සපයන සමාගම් වලට සම්බාධක පැනවෙන අතර එමගින් ව්‍යාපෘතියේ කටයුතු අඩාල කිරීම අමෙරිකාවේ අරමුණවී තිබේ.

නෝර්ඩ් ස්ට්‍රීම් 2 ව්‍යාපෘතියට දැඩිව එරෙහි වන සෙනෙට් සභිකයන්ගේ මතය වී ඇත්තේ ව්‍යාපෘතිය සාර්ථක වුවහොත් රුසියානු ජනාධිපති ව්ලැදිමීර් පුටින් නිදහස් ලෝක ජනයාගේ කරපිටින්  තව තවත් ශක්තිමත් වීම වැලැක්විය නොහැකි බවයි.
2020 ජාතික ආරක්ෂක අධිකාරී පනතට සහයෝගය දක්වන සෙනට් සභික ටෙඩ් කෘස් මාධ්‍ය වෙත අදහස් දක්වමින් පවසා සිටියේ ” නෝර්ඩ් ස්ට්‍රීම් 2 ව්‍යාපෘතිය සමඟ සම්බන්ධවී සිටින සමාගම් වලට දණ්ඩන නියම කිරීමෙන් යුරෝපයේ බලශක්ති සුරක්ෂිතතාවය ගොඩ නැංවෙන අතරම රුසියානු ජනාධිපති ව්ලැදීමීර් පුටින් හට ආක්‍රමණශීලීව හැසිරීමට අවශ්‍ය වන ඩොලර් බිලියන ගණනක මුදල් නවතාලීමට හැකිවනවා” යනුවෙනි.
සම්මතවූ පනතින් ඩොලර් බිලියන 740ක මුදලක් වෙන් වී ඇත්තේ අමෙරිකානු හමුදාවේ නවතම අංශයක් වන අමෙරිකානු අභ්‍යවකාශ අංශය ස්ථාපිත කිරීමට සහ මෙක්සිකෝ අමෙරිකා දේශ සීමාවේ දැවැන්ත තාප්පයක් ඉදිකිරීම වෙනුවෙනුයි. පනත ක්‍රියාත්මක වීමට දැන් අවශ්‍ය වන්නේ අමෙරිකානු ජනාධිපති ඩොනල්ඩ් ට්‍රම්ප් ගේ අත්සන පමණි.