යල මහ දෙකන්න කුඹුරු ගොවිතැන් කළ අපේ මුතුන්මිත්තන් වී වගාවෙ අස්වනු නෙළනතුරු කුඹුරේ නියර යොදාගෙන අස්වනු නෙළාගැනීම, නියර වගාව හැටියටයි හැදින්වුවෙ. මේ සදහා කුඹුරේ සෑම නියරක්ම යොදාගන්නෙ නෑ . තරමක් පළල් නියරවල් විශේෂයෙන් මායිම් සටහන් වන “ඉන් නියරවල්” යොදාගත්තා. මෑ, කව්පි, මුං ඇට, බණ්ඩක්කා වගාවන් අතර බඩඉරිඟු වගාවත් කළා . කුඹුරු වැපිරීමෙන් පසු නියර වගාව සිදුකරන හෙයින් අමුතුවෙන් රැකුම් බැලුම් කළයුතු වුණේ නෑ .

දිනපතා වෙලට යමින් එමින් ගමන් නියර වගා ගැනත් හොයා බැලුවා . පලිබෝධ අනතුරු අවම සොබාදහමේ අපූරු ගොවිතැනක් වෙච්ච නියර වගාව සහමුලින්ම වසවිස ආදියෙන් තොරයි. ඒ වගේම ගෙදර දොර කෑමටත් යොදාගත්තෙ බෝ නොවන රෝගවලින් තොරවයි.

වැඩිපුර ඩිංගක් මහන්සි වෙලා නියර ගොවිතැන් කළොත් අතමිටත් යහමින් සරු වෙනවා . අපේ කොල්ලො පුරන් කුඹුරු වපුරන්ට වෑයම් කරන මේ සන්දියේ අපේ මුතුන්මිත්තන්ගේ නියර වගාව ට හුරුවුණොත් අතිරේක මුදලකුත්, වසවිසෙන් තොර සොබාදහමේ ගොවි උරුමයටත් හිමිකම් කියන්න වාසනාව උදාවෙනවා ……

Mahinda Kumara Dalupotha