හිටපු ජනාධිපති මහින්ද රාජපක්ෂ මහතා සහ ඒකාබද්ධ විපක්ෂයේ පක්ෂ නායකයින් අතර විශේෂ සාකච්ඡාවක් 27 දින සවස 5.00ට කොළඹ 07 විජේරාම මාවතේ පිහිටි හිටපු ජනාධිපතිවරයාගේ නිලනිවසේදී පැවැත්වීමට නියමිතයි.

පළාත් පාලන මැතිවරණයෙන් පසුවත් ආණ්ඩුව ජනමතයට කන්නොදී සිදුකරගෙන යනු ලබනවැඩපිලිවෙල සහ ඊට එරෙහිව ගතහැකි ක්‍රියාමාර්ග ගැන මෙහිදී සාකච්ඡා කිරීමට නියමිත බව ඒකාබද්ධ විපක්ෂයේ ජේෂ්ඨ නියෝජිතයෙකු ප්‍රකාශ කළේය.

ජනතාව මත තව තවත් බදුබර පැටවීම, රටේ ආර්ථිකය පහළ හෙළීමට කටයුතු කිරීම, රාජ්‍ය දේපල විකුණා දැමීම, දිගින් දිගටම සිදුකරනු ලබන දේශපාලන පළිගැනීම් යන කරුණුවලට එරෙහිවෙමින් නීත්‍යානුකුල පියවර ගැනීමට සහ ජනතා සහභාගීත්වයෙන් සිදුකරනු ලබන විරෝධතා ව්‍යාපාර ගැනද මෙහිදී දීර්ඝ වශයෙන් සාකච්ඡා කිරීමට නියමිත බවද එම නියෝජිතයා සඳහන් කළේය.

මීට අමතරව මාර්තු 7 වැනිදා ආණ්ඩුවට එරෙහිව නුගේගොඩදී පැවැත්වෙන ජනරැළිය සහ ආණ්ඩුව ඉල්ලා අසවනතුරු රටපුරාම මෙම ජනරැළි මාලාව සංවිධානය කිරීම යන කරුණු ගැනද මෙහිදී සාකච්ඡා කිරීමට නියමිත බව ඒකාබද්ධ විපක්ෂයේ එම ජේෂ්ඨ නියෝජිතයා වැඩිදුරටත් ප්‍රකාශ කළේය.