රජයේ වියදම් වෙනුවෙන් අවශ්‍ය මුදල් වෙන්කර ගැනීම සඳහා නව පරිපූරක ඇස්තමේන්තුවක් ලබන පාර්ලිමේන්තු සතියේ දී පාර්ලිමේන්තුවට ඉදිරිපත් කරන බව කැබිනට් ප්‍රකාශක ඇමැති ආචාර්ය බන්දුල ගුණවර්ධන මහතා අද (30) පැවසීය.

පැවති රජය විසින් කොන්ත්‍රාත්කරුවන්ට හා සැපයුම්කරුවන්ට ලබාදිය යුතු රුපියල් කෝටි 13,000 ක් ගෙවන්නට සිදුවීම ඇතුළු රජයේ වියදම් සඳහා දැනට පවතින පරිපූරක ඇස්තමේන්තුවෙන් වෙන්කර ඇති මුදල් ප්‍රමාණවත් නොවන නිසා මෙම තීරණය ගෙන ඇතැයි ද ඇමැතිවරයා කීවේය.

අගමැති සහ මුදල් අමාත්‍ය මහින්ද රාජපක්ෂ මහතා විසින් පාර්ලිමේන්තුවේදී විශේෂ ප්‍රකාශයක් කර පසුව මෙම පරිපූරක ඇස්තමේන්තුව පාර්ලිමේන්තුවට ඉදිරිපත් කරනු ඇතැයි ඇමැතිවරයා සදහන් කළේය.

දැනට ලබාගත හැකි ණය සීමාව ද මෙහිදී වෙනස් කරන්නට සිදුවන බව ඇමැතිවරයා පැවසීය.

බන්දුල ගුණවර්ධන මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී පැවති මාධ්‍ය හමුවක් අමතමිනි.