ආණ්ඩුව විසින් දෙසැම්බර් මාසයේදී වැය කරන ලද රුපියල් කෝටි දෙදහස් හත්සිය තිස්හයකට අධික අමතර මුදල වෙනුවෙන් ඊයේ (05 වැනිදා) පාර්ලිමේන්තුවට පරිපූරක ඇස්තමේන්තුවක් ඉදිරිපත් කරනු ලැබීය.

විශ‍්‍රාම වැටුප් සඳහා රුපියල් කෝටි 708 ක්, කල්බදු ක‍්‍රමයට ලබාගෙන ඇති වාහනවල කුලී සඳහා කෝටි 06 ක් අමතර මුදල් වශයෙන් එම මාසයේදී වැය කර ඇත.

ඊට අමතරව ආචාර්ය නෙවිල් ප‍්‍රනාන්දු රෝහලේ මෙහෙයුම් කටයුතු සඳහා අතිරේකව ගෙවා ඇති රුපියල් කෝටි 08 ක්, මහපොළ ශිෂ්‍යාධාර වෙනුවෙන් රුපියල් කෝටි 16 ක්, වෛෙද්‍ය නිලධාරීන්, හෙදියන් සහ අතුරු වෛද්‍යවරුන්ගේ අමතර දීමනා වෙනුවෙන් රුපියල් කෝටි 520 ක්, සෞඛ්‍ය අමාත්‍යාංශය විසින් විදුලි බලය, ජලය, ආරක්‍ෂාව, පිරිසිදු කිරීම ආදිය වෙනුවෙන් රුපියල් කෝටි 100 ක මුදලක් ද අනුමත කර දෙන ලෙස ඉහත පරිපූරකය මගින් ඉල්ලා තිබිණි.

ඒ අනුව එම පරිපූරකයෙන් ඉල්ලා තිබූ මුළු මුදල රුපියල් දෙදහස් හත්සිය තිස්හයකෝටි හතළිස්හතර ලක්‍ෂයකි.