මුලතිව් රෝහලේදී තවත් අයකු මෙතෙක් නිවැරැදිව හඳුනා ගැනීමට නොහැකි වූ උණ රෝගයට ගොදුරුවී පෙරේදා (03දා) රාත්‍රි මියගොස් තිබේ.

මේ අනුව මෙම මාර්තු මාසය ඇතුළත මුලතිව් රෝහලෙන් මියගිය දෙවැනි උණ රෝගියා මෙම රෝගියා වෙයි.
පසුගිය වසරේ අවසන් මාස හතර ඇතුළතදී මෙම උණ රෝගයට ගොදුරුවී මුලතිව් දිස්ත්‍රික්කයේ රෝගීන් 9 දෙනකු හා යාපනයේ රෝගීන් 12 දෙනකු වරින්වර මිය යෑමත් සමඟම යාපනයේ වැසියෝ එම උණ රෝගය භූත උවදුරක් නිසා හටගත් උණ රෝගයක් බව පවසමින් නිවෙස් පවා අතහැර ගියහ.

මුළු යාපනයම බියට පත්වී යාපනයේ කුඩා වෙළෙන්දන්ට අයත් වෙළෙඳ සංකීර්ණය සම්පූර්ණයෙන්ම පාහේ වැසී යෑමට මෙම භූත කතාව සමත්වූ අතර මෑතකදීද භූතයන් පලවා හැරීම පිණිස එම වෙළෙඳ මධ්‍යස්ථානයේ ශාන්තිකර්මයක් පවත්වන ලදී.