මැතිවරණ වලට තරග කිරීම පිණිස භික්ෂූන් වහන්සේලාට නාමයෝජනා ලබාදිය නොහැකි ලෙස මැතිවරණ පනතට සංශෝධන ගෙනා යුතු බව අස්ගිරි පාර්ශ්වයේ මහනායක අතිපූජ්‍ය වරකාගොඩ ශ්‍රී ඤාණරතන මහනාහිමියෝ පැවැසූහ.

පවතින මැතිවරණ නීතිය පැරණි එකක් බැවින් ඊට සංශෝධන ගෙන එමින් අදාළ කටයුත්ත කඩනමින් කළ යුතුව තිබෙන බවද උන්වහන්සේ කියයි.

මැතිවරණ කොමිසමේ සභාපති මහින්ද දේශප්‍රිය ඊයේ (03 වැනිදා) අස්ගිරි මහවිහාරයට ගොස් මහනාහිමියන් බැහැදැක ආශිර්වාද ලබාගත් අවස්ථාවේ උන්වහන්සේ මේ බව පවසා ඇත.

භික්ෂූන් වහන්සේ ඍජුව දේශපාලනයට යොමු වීමෙන් ශාසනය පිරිහීමට ලක්වෙනවා. අතීතයේ මෙන්ම පාලකයින්ට දැහැමිව රට පාලනය කිරීම පිණිස අවවාද අනුශාසනා කිරීම මහ සංඝරත්නයේ කාර්යභාරයයි. ඉන් ඔබ්බට ගොස් මහ සංඝරත්නය ඍජුව දේශපාලනය කිරීමට යාමෙන් විශාල පිරිහීමක් ශාසනයේ ඇති වුණා යැයි මහානාහිමියෝ මෙහිදී වැඩිදුරටත් පැවැසූහ.

මෙහිදී අදහස් දැක්වූ මැතිවරණ කොමිසමේ සභාපතිවරයා මල්වතු මහනායක හිමියෝද මෙම අදහසම ප්‍රකාශ කළේ යැයි පැවසුවේය.

මැතිවරණය ප්‍රකාශයට පත්කර තිබෙන අවස්ථාවක අපේක්ෂකයින්ට මහනාහිමිවරු බැහැදැකීමට පැමිණිය හැකි වුවත් විහාරස්ථාන භූමියේ මාධ්‍යයට ප්‍රකාශ ලබාදීමට නොහැකි බව මහින්ද දේශප්‍රිය මෙහිදී පවසයි.