කොළඹ නගරයේ ආපනශාලාවලින් ලබාදෙන තේ සම්බන්ධයෙන් පාරිභෝගිකයින් වැඩි අවධානයක් යොමුකළ යුතු බව කොළඹ මහනගර සභාවේ මධ්‍යම අහාර පාලන ඒකකය දැනුම් දෙයි.

පසුගිය දා ගෝල්ෆේස් ප්‍රදේශයේදී කසළ තේ කිලෝග්‍රෑම් 3000ක් ප්‍රවාහනය කළ ලොරි රථයක් සොයාගත් බවත්, අදාළ ලොරි රථයේ හිමිකරු සහ රියදුුරා එහිදී ප්‍රකාශ කර ඇත්තේ අදාළ කසළ තේ කොළඹ නගරයේ ආපනශාලාවලට ලබාදීමට තමන් කටයුතු කරන බවයි.

ඒ අනුව අදාළ කසළ තේ තොගය මධ්‍යම ආහාර ඒකකය බාරයට ගෙන ඇති අතර ඒ සම්බන්ධයෙන් නීතිය ක්‍රියාත්මක කිරීමට ද නිලධාරීන් කටයුතු කරමින් සිටී.

ඇතැම් ආපනශාලාවල තේ සෑදීම සඳහා කසළ තේ උපයෝගී කරගන්නා බවට ලැබෙන තොරතුරු මත මෙම සොයා බැලීම සිදුකර තිබේ.

එහෙයින් ඉදිරියටද එවන් ගැටලු සම්බන්ධයෙන් පැමිණිලි ඇත්නම් වහාම දැනුම් දෙන ලෙස කොළඹ මහනගර සභාවේ මධ්‍යම ආහාර පාලන ඒකකය ජනතාවට දැනුම් දෙයි.

මෙලෙස කසළ තේ උපයෝගී කරගනිමින් තේ සකස් කරන බවට තොරතුරු ඇත්නම් 0112 67 61 61 යන දුරකතන අංකයට දැනුම් දිය හැකි බව ඔවුන් වැඩිදුරටත් කියා සිටී.