අද(25) දිනයේ ජාතික වසංගත රෝග විද්‍යා අංශය විසින් නිකුත් කරනු ලැබූ වාර්තාවට අනුව 24 වන දින අළුතින් සොයාගත් කොරෝනා වෛරස් රෝගීන් සංඛ්‍යාව 5දෙනෙකුට සීමා වී ඇති බව පැවසේ.එය  23 වන දිනයේ වාර්තා වූ නව රෝගීන් 10 දෙනා සමඟ සැසඳිමේදී  COVID-19 වෛරසය අළුතින් ආසාදිතයන්ගේ  පහළ යාමකි.

කෙසේ වුවද රජයේ වෛද්‍යය නිළධාරීන්ගේ සංගමය පවසා සිටින්නේ රෝහල් වල රෝහල් වල සිටින වෛරසය ආසාදිතයන් මෙන්ම රෝහල් වලට නොපැමිණි ආසාදිතයන් 552ක් රටපුරා සිටිය හැකි බවයි. ජාතික වසංගත රෝග විද්‍යා අංශය විසින් නිකුත් කරනු ලැබූ වාර්තාවට අනුව COVID-19 වෛරසය ආසාදිතයන්ගෙන් 4.9%ක් වයස අවුරුදු 10ට අඩු අය වන අතර වයස අවුරුදු 11-20 ත් අතරද සමස්ථ ආසාදිතයන්ගෙන් 4.9%ක් සිටින බව පැවසේ.

වයස අවුරුදු 21-30 සහ වයස අවුරුදු 31-40 අතර වයස් කාණ්ඩවල හමුවන ආසාදිතයන් ප්‍රමාණය ප්‍රතිශතාත්මකව එක් කාණ්ඩයක 16.7% බැගින් වේ.වැඩිම ආසාදිතයන් පිරිසක් හමුවන්නේ වයස් කාන්ඩ 41-50 කාණ්ඩයේ වන අතර එම අගය 33.3%කි. වයස අවුරුදු 51-60 කාණ්ඩයේ වෛරසය ආසාදිත ප්‍රතිශතය 15.7% කි. වයස අවුරුදු 61-70 කාණ්ඩයේ වෛරසය ආසාදිත ප්‍රතිශතය 6.9%කි.වයස අවුරුදු 71-80 අතර වෛරසය ආසාදිත වූවන් 1%ක් තරම් අඩු අගයක් ගනිද්දී අවුරුදු 81-90 අතර කාන්ඩයේ එකදු රෝගියෙක් වත් හමු නොවේ.

ඒ අනුව ශ්‍රී ලංකාවේ කොරෝනා වෛරසය ආසාදිතයන් අතර දරුවන් සහ වැඩිහිටියන් අඩු ප්‍රතිශතයක් පෙන්වීම රෝගීන් ගේ මරණ සංඛ්‍යාව අඩු කර ගැනීමට ඉවහල් වන බව පැවසේ. තවද වාර්තාවට අනුව වෛරසය ආසාදනය වූ පුද්ගලයන්ගෙන් 68%ක් පුරුෂ පාර්ශවයේ වන අතර 32%ක් ස්ත්‍රී පාර්ශවයේ වෙයි. ශ්‍රී ලංකාවේ COVID-19 වෛරස ආසාදිතයන් හමුවීම රට අනුව වර්ග කිරීමේදී ප්‍රංශය , ඉන්දියාව සහ චීනය යන රටවලින් 1% බැගින් වාර්තා වන අතර ආසාදිතයන්ගෙන් 97.1% ක්ම ශ්‍රී ලාංකිකයන් වේ.