කොරෝනා වයිරස ව්‍යාප්තිය පටන්ගත් චීනයේ වුහාන් නගරයේ වසා දැමීම් ලිහිල් කරමින් නගරයට ඇතුළුවන මාර්ග විවෘත කළ අතර දුම්රිය සේවා යළි ආරම්භ කර ඇතැයි වාර්තා වේ.

2019 වසරේ දෙසැම්බර් අග දී ප්‍රථම වරට වයිරස ව්‍යාප්තිය ඇරඹුණු හුබෙයි පළාතේ වුහාන් නගරය මාස දෙකක පමණ කාලයක් හුදකලා කර තිබිණි.

අද(28) උදෑසන පළමු අධිවේගී දුම්රිය නගරයට ඇතුළුවුණු අතර බොහෝ පිරිස් දුම්රිය වේදිකාවල රැස්වී සිටි බව සඳහන් වේ.

චීනයේ  කොරෝනා වයිරස රෝගීන් සංඛ්‍යාවෙන් සියයට 60ක් වුහාන් නගරයෙන් වාර්තා විය.

නමුත් මෑත සතිවල රෝගීන් වාර්තා වීම විශාල වශයෙන් පහල ගිය අතර වාර්තා වුණු වැඩි පිරිස විදේශයන්හි සිට නැවත චීනයට පැමිණි අය බව සඳහන් විය.

චීනයේ ජාතික සෞඛ්‍ය කොමිසම පවසා සිටියේ පසුගිය දිනය තුළ වාර්තා වූයේ නව රෝගීන් 54ක් සහ මරණ තුනක් බවයි.
මේ අනුව කොරෝනා වයිරසයෙන් චීනයේ වාර්තා වූ සම්පූණ රෝගීන් සංඛ්‍යාව 81384ක් දක්වා ඉහල ගොස් ඇති ඇත.
වයිරස ව්‍යාප්තිය හේතුවෙන් චීනයේ 3295 දෙනකු මියගියහ.

(රොයිටර් පුවත් ඇසුරිණි – 085)