කොළඹ, ගම්පහ, කළුතර, පුත්තලම, මහනුවර සහ යාපනය යන දිස්ත්‍රික්ක හැර දිවයිනේ සෙසු දිස්ත්‍රික්කවලට පනවා තිබූ ඇඳිරි නීතිය මේවනවිට තාවකාලිකව ඉවත් කර තිබේ.

එම දිස්ත්‍රික්ක සඳහා අද (30) පස්වරු 02.00 සිට යළි ඇඳිරි නීතිය පැනවීමට නියමිතයි.

කොළඹ, ගම්පහ, කළුතර, පුත්තලම, මහනුවර සහ යාපනය යන දිස්ත්‍රික්ක 06 හැර දිවයිනේ සෙසු දිස්ත්‍රික්කවලට පනවා තිබූ ඇඳිරි නීතිය අද උදෑසන 6.00 ට තාවකාලිකව ඉවත් කෙරුණේ ජනතාවට අත්‍යවශ්‍ය භාණ්ඩ හා සේවා සපයාගැනීම සඳහායි.

ඇඳිරි නීතිය ඉවත් කෙරෙන ප්‍රදේශවල අත්‍යවශ්‍ය සේවා හැර වෙනත් කාර්යයන් සඳහා දිස්ත්‍රික්ක අතර ගමනාගමනය සම්පූර්ණයෙන්ම තහනම් වේ.

බොහෝ ප්‍රදේශවල ජනතාව සෞඛ්‍ය උපදෙස් අනුගමනය කරමින් නගරවල හැසිරෙන ආකාරය දැකගත හැකි විය.

කෙසේවෙතත් ඇතැම් ස්ථානවල ජනතාව හැසිරී තිබුණේ සෞඛ්‍ය උපදෙස් කෙරෙහි අවධානය යොමු නොකරමින්.

මේ අතර ඇඳිරි නීතිය ඉවත් කිරීමත් සමග ඖෂධ ලබා ගැනීම සඳහා ඔසු සල් අසල ජනතාව පෙළ ගැසී සිටිනු දක්නට ලැබුණි.

ඇඳිරි නීතිය තාවකාලිකව ඉවත් කෙරුණද බදුල්ල දිස්ත්‍රික්කයේ වැලිමඩ, බණ්ඩාරවෙල, හපුතලේ සහ දියතලාව යන ප්‍රදේශවල තොග සහ සිල්ලර වෙළඳසැල් මෙන්ම සුපිරි වෙළඳසැල්ද වසා දැමීමට තීරණය කර ඇති බව බණ්ඩාරවෙල පොලිස් අධිකාරී අතුල ද සිල්වා මහතා සඳහන් කළේය.

ඒ, බණ්ඩාරවෙල නගරයෙන් කොරෝනා ආසාදිතයෙකු සොයාගැනීම හේතුවෙන් ජනතාව ආරක්ෂාක කරගැනීමේ පූර්ව ක්‍රියාමාර්ගයක් ලෙසයි.

කෙසේවෙතත් එම ප්‍රදේශවල රාජ්‍ය හා පෞද්ගලික බැංකු විවෘතව පවතියි.

ඇඳිරි නීතිය ඉවත් කළද අනුරාධපුර දිස්ත්‍රික්කයේ ගලෙන්බිඳුණුවැව, කහටගස්දිගිලිය සහ හොරොව්පතාන යන නගරවල වෙළෙඳසල් වසා තැබීමට පොලිසිය පියවර ගත්තේය.

මහනුවර අකුරණ ප්‍රදේශයෙන් හමුවු කොරෝනා අසාදිත පුද්ගලයා මෙම ප්‍රදේශවල සංචාරය කර ඇති බවට ලැබුණු තොරතුරු හේතුවෙන් ජනතාව ගැවසීම අවම කිරීමට මේ පියවර ගෙන තිබුණි.

අනුරාධපුර නොච්චියාගම නගරයේ වෙළෙඳසල්ද අද විවෘත නොකිරීමට එම වෙළෙඳ සංගමය තීරණය කර තිබුණේ ජනතාව සෞඛ්‍ය උපදෙස් අනුගමනය නොකිරීමෙන් ඇතිවන තත්ත්වය වළක්වා ගැනීමේ අරමුණින්.