ඇමෙරිකා එක්සත් ජනපදයට ගුවන් යානා රැගෙන යා හැකි ‘තියඩෝර් රූස්වෙල්ට්’ නෞකාවේ නාවිකයන් කොරෝනා වයිරසයෙන් මියයෑමේ අවදානමක් තිබෙන ඉතා ඉක්මනින් ඔවුන් බේරාගත යුතු බවත් එම නෞකාවේ කපිතාන්වරයා අවධාරණය කරයි.

නෞකාවේ 5,000කට වැඩි පිරිසක් සිටින බවත් ඉතා විශාල පිරිසකට කොරෝනා වයිරසය ආසාදනය වී ඇති බවත් හෙතෙම කීය.

කොරෝනා වයිරසය ආසාදනය වී ඇති ගණන නිශ්චිතව කිව නොහැකි බව ද හෙතෙම කීය.

එම නෞකාවෙන් පළමු වරට කොරෝනා ආසාදිතයකු වාර්තා වූයේ පසුගිය සතියේ වන අතර බටහිර ශාන්තිකර කලාපයේ ඇමෙරිකාවට අයත් පරිපාලන දූපතක් වන ගුවාම් ආසන්නයේ මෙම නෞකාව නැංඟුරම් ලා ඇත.

නෞකාවේ කපිතාන් බ්‍රෙට් ක්‍රෝසියර් පිටු හතරකින් යුත් ලිපියක් ලියමින් සිය නාවිකයන් බේරාගැනීමට උපකාරී වන්නැයි ඇමෙරිකානු බලධාරීන්ගෙන් ඉල්ලා ඇත.

නෞකාවේ සිටින 4,000කට වැඩි නාවිකයන් පිරිස ඉන් මුදාගෙන හුදෙකලා කර ඔවුන් ප්‍රමාණවත් පරිදි නිරෝධායන ක්‍රියාවලියට යොමු කරන්නැයි ද ඔහු සිය ලිපියෙන් ඉල්ලා ඇත.

මේ සඳහා කඩිනම් පියවර ගන්නැයි ද ඔහු ඇමෙරිකා බලධාරීන්ගෙන් ඉල්ලා තිබෙන අතර මෙම නෞකාව සතුව න්‍යෂ්ටික බලශක්තිය ද ඇත.

නෞකාවේ කපිතාන්වරයා ලිපිය යවා ඇත්තේ සඳුඳා දින දාතම ඇතිවය.

‘‘අපි යුද්ධයකට මුහුණ දීලා නැහැ. ඒ නිසා නාවිකයන්ට මැරෙන්න දෙන්න බැහැ. ඔවුන් ජීවත් වෙන්න ඕනෑ. අපි ඉක්මන් නොවුණත් අපේ ඉතාම වටිනා වත්කම වන අපේ නාවිකයන් බේරගත්තේ නම් අපි අසමත් වෙනවා’’ යැයි කපිතාන්වරයා සිය ලිපියේ සඳහන් කර ඇත.

නෞකාවේ සිටින පිරිසෙන් සියයට 80කට වැඩි පිරිසකට කොරෝනා වයිරසය ආසාදනය වී ඇතැයි නම සඳහන් නොකළ ඇමෙරිකානු පරිපාලනයට සම්බන්ධයෙන් නිලධාරියෙක් රොයිටර්ස් පුවත් සේවයට පැවැසීය.

නෞකාවේ සිටින 5,000කට ආසන්න පිරිස ඇමෙරිකා එක්සත් ජනපදයේ කුඩා ගම්මානයක සිටින පිරිසට සමාන වේ.
අදාළ ලිපිය සම්බන්ධයෙන් මුලින්ම වාර්තා කර තිබුණේ ‘සැන් ෆ්‍රැන්සිස්කෝ ක්‍රොනිකල්’ වන අතර පසුව රොයිටර්ස් පුවත් කරන ලද විමසීමකදී ඇමෙරිකාව එය තහවුරු කර තිබිණි.

ඒ.එෆ්.පී./රොයිටර්