මෙරටින් වාර්තා වන කොවිඩ් නයින්ටීන් ආසාදිතයින්ගේ ගණන 171 ක් දක්වා ඉහළ ගොස් තිබේ.

අද දිනයේ තවත් කොවිඩ් නයින්ටීන් වෛරස ආසාදිතයින්  5 දෙනෙකු වාර්තා වූ බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා පැවසුවේය.

අවසන් වරට හදුනාගත් ආසාදිතයින්ගෙන් තිදෙනෙකු හෝමාගම මූලික රෝහලෙන් වාර්තා වී ඇති අතර එක් පුද්ගලයෙකු පුත්තලම නිරෝධායන මධ්‍යස්ථානයක රැදී සිටි අයෙකු බව සදහන්ය.

කොවිඩ්-19 ආසාදිත පුද්ගලයෙකු සමීපව ඇසුරු කළ මාතර ප්‍රදේශයේ පදිංචි අයෙකුට ද වෛරසය ආසාදනය වී ඇති බවයි විශේෂඥ වෛද්‍ය අනිල් ජාසිංහ මහතා සදහන් කළේය.

කොළඹ දිස්ත්‍රික්කයෙන් දෙදෙනෙකු සහ මීගමුව ප්‍රදේශයෙන් එක් අයෙකු මෙම ආසාදිතයින් අතර වන බවද අනිල් ජාසිංහ මහතා පැවසුවේය.

මේ අතර රෝගය ආසාදනය වූ පුද්ගලයින් 29 දෙනෙකු මේ වන විට පූර්ණ සුවය ලබා රෝහල්වලින් පිටව ගොස් ඇති අතර මෙරටින් වාර්තා වන මරණ සංඛ්‍යාව 5 ක් වෙයි.

රෝගීන් 137 දෙනෙකු තවදුරටත් රෝහල්ගතව ප්‍රතිකාර ලබන බව වසංගත රෝග විද්‍යා අංශය සඳහන් කළේය.

එමෙන්ම කොවිඩ් නයින්ටීන් වෛරසය ආසාදනය වී ඇති බවට සැක කෙරෙන පුද්ගලයින් 259 දෙනෙකු දිවයිනේ රෝහල් කිහිපයක වෛද්‍ය අධීක්ෂණය යටතේ පසුවන බව ද සඳහන්ය.