කොවිඩ් නයින්ටීන් වෛරස ව්‍යාප්තියේ අධි අවදානම් කලාප ලෙසනම් කර ඇති දිස්ත්‍රික්ක හැර සෙසු දිස්ත්‍රික්ක 19ට තාවකාලිකව ලිහිල් කර ඇති ඇඳිරි නීතිය අද පස්වරු 02.00ට යලි ක්‍රියාත්මක කිරිමට නියමිතව ඇත.

අධි අවදානම් කලාප ලෙස නම් කර ඇති දිස්ත්‍රික්කවන කොළඹ, ගම්පහ, කළුතර, පුත්තලම, මහනුවර සහ යාපනය යලි දැනුම් දෙන තුරු ඇඳිරි නීතිය ක්‍රියාත්මකයි.

සෙසු දිස්ත්‍රික්කවලට අද උදෑසන 06.00ට තාවකාලිකව ඇඳිරිනීතිය ඉවත් කෙරුණු අතර යලි පස්වරු 02.00 සිට ඇඳිරි නීතිය පැනවෙනු ඇති.

එම දිස්ත්‍රික්ක වලට ඇඳිරි නීතිය යලි ලිහිල් කරන දිනය පසුව දැනුම් දෙන බවයි රජය පැවසුවේ.

මේ අතර ඇඳිරි නීතිය ලිහිල් කළ ප්‍රදේශවල ජනතාව සිය අවශ්‍යතා ඉටු කර ගැනිම වෙනුවෙන් නගරාශ්‍රිත ප්‍රදේශ වෙත පැමිණ සිටියේය.

එහිදී බොහෝ පිරිසක් සෞඛ්‍ය ආරක්ෂිත ක්‍රමවේද අනුගමනය කර තිබූ ආකාරය ද දක්නට ලැබුණු බවයි අද දෙරණ ප්‍රාදේශිය වාර්තාකරුවන් සඳහන් කළේ.

දඹුල්ල ප්‍රදේශයේ ගොවින් සිය වගාවන් සඳහා අවශ්‍ය ද්‍රව්‍ය මිලදී ගැනිම සඳහා විශාල වශයෙන් පැමිණි සිටි බව අද දෙරණ ප්‍රාදේශිය වාර්තාකරු පැවසීය.

කොරෝනා වෛරස ව්‍යාප්තිය පාලනය කිරිම සඳහා පසුගිය 20 වනදා සිට දිවයින පුරා ඇදිරි නීතිය පැනවීමට රජය කටයුතු කළේය.