රුසියාවේ කොරෝනා වයිරස් ආසාදිත රෝගීන්ගෙන් 30% කට ආසන්න සංඛ්‍යාවක් අදාල රෝග ලක්ෂණ කිසිවක් නොපෙන්වන බව ආසාදිත හා පැතිර යන රෝග පිළිබඳ රුසියාවේ ප්‍රධාන වෛද්‍ය නිලධාරිනී Anna Papova පැවසීය.

ඇය පවසන පරිදි, කිසිදු රෝග ලක්ෂණයක් නොමැති නිරෝගී පුද්ගලයින් පරීක්ෂා කිරීම වැඩි වන විට, රෝගීන් ගණන ද එන්න එන්නම වැඩි වී තිබේ. මෙවැනි පුද්ගලයන් වෛරස වාහකයින් වන අතර, ඔවුන් ඒ පිළිබඳව නොදැන සිටීම වෛරසය ප්‍රචාරය වැඩිවීමට හේතු වේ. එබැවින් නිරෝගී පුද්ගලයින් පවා තම නිවෙස් තුළට වී සිටීමේ වැදගත්කම පිළිබඳව ඇය තවදුරටත් අවධාරණය කර ඇත.

අඟහරුවාදා (04.14) දින මොස්කව් ප්‍රාන්තයේ වාර්තා වූ කොරෝනා ආසාධිතයන් ගෙන් 52% වන පිරිසකට අදාළ රෝග ලක්ෂණ කිසිවක් පෙන්නුම්කර නැත. මේ වන විට මොස්කව් ප්‍රාන්තයේ පමණක් දිනකට පරීක්ෂණ 25,000 සිදුකරන අතර, රුසියානු ජනාධිපති ව්ලැදිමීර් පුටින් එම සංඛ්‍යාව දෙගුණයක් කරන මෙන් පවසා තිබේ. අද (15.04) වන විට රුසියාව තුල COVID-19 තහවුරු කර ගැනීම සඳහා පරීක්ෂණ මිලියන 1.5 ප්‍රමාණයක් සිදු කර ඇත.

මොස්කව්හි, කොරෝනා වයිරස අසාදිත රෝගීන් වැඩිම සංඛ්‍යාවක් වාර්තා වී ඇත. එය 04.14 දිනට 13,002 කි. රුසියාවේ සියලු රෝගීන් ගණන 21,102 ක් ලෙස තහවුරු විය.

මූලාශ්‍ර – news.mail.ru