නව සපිරි ග්‍රාමීය ණය යෝජනා ක්‍රමය යටතේ බෝග වර්ග 36 ක් සඳහා රුපියල් ලක්‍ෂ 5 ක් දක්වා ණය මුදල් ලබා දීමට පියවර ගැනෙනවා. 4% ක පොළී අනුපාතයකට අනුව මෙය ගෙවනු ලබන්නේ රාජ්‍ය බැංකු මගිනුයි.

නව සපිරි ග්‍රාමීය ණය යෝජනා ක්‍රමය යටතේ ලබා දෙන ණය ආපසු ගෙවීමේ කාලය මාස 9 ක් බවයි අත්‍යවශ්‍ය සේවා සඳහා වූ විශේෂ ජනාධිපති කාර්ය සාධක බලකාය සඳහන් කරන්නේ. වී,  මිරිස්,  ළූණු,  කව්පි,  මුංඇට,  උඳු,  සෝයා සහ කුරක්කන් යන බෝග සඳහා මෙම ණය මුදල් හිමිවනවා. එමෙන්ම බඩඉරිඟු,  රටකජු,  තල,  සූරියකාන්ත,  අල,  බතල,  මඤ්ඤොක්කා හා කිරිඅල බෝග වෙනුවෙන් ද මෙම මුදල් ලබා දීමට නියමිතයි.

එළවළු,  වම්බටු,  බණ්ඩක්කා,  බීට්,  බෝංචි, ගෝවා,  කැරට්,  මාළුමිරිස්, තක්කාලි,  ලීක්ස්, රාබු, නෝකෝල්,  කරවිල,  පතෝල,  වට්ටක්කා,  වැටකොලු,  ඉඟුරු,  උක් සඳහා ද සපිරි ග්‍රාමීය ණය යෝජනා ක්‍රමය යටතේ මුදල් හිමිවන බව අත්‍යවශ්‍ය සේවා සඳහා වූ විශේෂ ජනාධිපති කාර්ය සාධක බලකාය නිවේදනය කරනවා. මෙම ණය යෝජනා ක්‍රමය යටතේ සෞභාග්‍යා ගෙවතු වැඩසටහන සඳහා එක් ගෙවත්තකට මෙම බෝග වගාව සඳහා රුපියල් හතළිස්දහසක උපරිමයකට යටත්ව සියයට 4 ක පොළියකට රාජ්‍ය බැංකු මගින් ණය ලබා දීමට මහ බැංකු අනුමැතිය හිමිව තිබෙනවා.

මේ සඳහා රජයෙන් ගෙවනු ලබන ණය සහනාධාරය සියයට 5 ක් වන අතර ණය ලබන්නාගේ පොළිය සියයට 4 ක් වන බවයි අත්‍යවශ්‍ය සේවා සඳහා වූ විශේෂ ජනාධිපති කාර්ය සාධක බලකාය සඳහන් කරන්නේ.