කොටි ත‍්‍රස්තවාදය පරාජය කර 11 වසරක් සපිරෙන්නේ අද දිනයේය.

ශ‍්‍රී ලංකා ආණ්ඩුව විසින් ‘මැයි මස දහඅට වැනිදා‘ ශ‍්‍රී ලංකාවේ තිස් අවුරුදු සිවිල් යුද්ධය නිල වශයෙන් නිම වූ දිනය හැටියට ප‍්‍රකාශයට පත් කරන ලද්දේ 2009 මැයි 18 වැනිදාය. හමුදා සහ කොටි සංවිධානය අතර පැවැති අවසන් ගැටුම් මුල්ලිවෛක්කාල් භූමියේදී හමුදාවේ ජයග‍්‍රහණයෙන් නිම විය. කොටි නායක ප‍්‍රභාකරන්ගේ දේහය හමුවූයේ මැයි 19 වැනිදා නන්දිකඩාල් කලපු තීරයෙනි.

ප‍්‍රභාකරන්ට සිය මරණීය උණ්‌ඩය වැදී තිබුණේ නලලේ වම් පැත්තට වන්නටය. අවසන් මෙහෙයුමේ දී විජයබා රෙජිමේන්තුවේ භටයකුගේ වෙඩි ප‍්‍රහාරයකින් ප‍්‍රභාගේ හිස සුනුවිසුණු විය. මැයි 17 වැනිදා වන විට නන්දිකඩාල් කලපුවේ කණ්‌ඩායම් තුනක්‌ ලෙසට එල්.ටී.ටී.ඊ. ත‍්‍රස්ත නායකයෝ ස්‌ථානගත වී සිටියහ. ‘බාබු’ හා ‘සුසෙයි’ එක්‌ කණ්‌ඩායමක්‌ ලෙසත් ‘පොට්‌ටු අම්මාන්’ ඇතුළු පිරිස තවත් කණ්‌ඩායමක්‌ ලෙසත් ප‍්‍රභාකරන් ඇතුළු පිරිස තවත් කණ්‌ඩායමක්‌ ලෙසත් කලපුව අවට ස්‌ථානගත වී සිටියහ. එහෙත් ප‍්‍රභාකරන්ගේ පණ සුන් සිරුර හමුවූයේ 19 වැනිදා පෙරවරුවේ නන්දිකඩාල් කලපුව අසල වැටී තිබියදී ය. ප‍්‍රභාකරන්ගේ බිරිඳ මෙන්ම දියණිය ද්වාරකාගේ සිරුරුත් පසුව සොයා ගැනීමට හැකිවිය. වැඩිමහල් පුතා වන ත‍්‍රස්තවාදී චාල්ස්‌ ඇන්තනීගේ දේහයත් මැයි 17 වැනිදා වන විටම සොයා ගෙන තිබිණි.

2006 වසරේ ජුලි 21 වැනිදා මාවිල්ආරු සටනින් ආරම්භ වූ යුද්ධය අවසන් වන්නේ ප‍්‍රභාකරන්ගේ මරණයෙනි.