ගුවන් යානා සහ ඩ්‍රෝන යානා ගුවනේදීම විනාශ කළ හැකි නව අධිබල ලේසර් ප්‍රහාරක අවියක් සිය යුද නෞකාවක් විසින් සාර්ථකව අත්හදා බැලූ බව ඇමරිකානු නාවික හමුදාව පවසයි.

එහි පැසිෆික් බලකායට අයත් යූ.එස්.එස් පෝට්ලන්ට් යුද නෞකාව අත්හදා බැලූ එම අවිය නව ලේසර් තාක්ෂණය උපයෝගී කර ගනිමින් නිපදවනු ලැබූවක් වේ.

පසුගිය 16 වනදා එය පැසිෆික් සාගරයේදී අත්හදා බැලූ බව ඇමරිකානු නාවික හමුදාව ප්‍රකාශ කළ ද එය සිදුකළ නිශ්චිත ස්ථානයක් හෙළිදරව් කර නැත.

මේ අතර, රුසියාවට සහ චීනයට අනතුරු ඇඟවීමක් ලෙස න්‍යෂ්ටික අත්හදා බැලීමක් සිදු කිරීම පිළිබඳව ඇමරිකානු ජනාධිපති ඩොනල්ඩ් ට්‍රම්ප්ගේ පරිපාලනය සාකච්ඡා කර ඇති බව වොෂින්ටන් පෝස්ට් පුවත්පත අනාවරණය කළේය.

1992 වසරෙන් පසු ඇමරිකාව න්‍යෂ්ටික අත්හදා බැලීමක් සිදු කර නැත.