මෙම එන්ජින් දහයෙන් අටක් මේ වන විට මෙරටට ගෙනැවිත් ඇත. මෙම එන්ජින් අතරින් එකක පවතින මෘදුකාංග ගැටලුවක් හේතුවෙන් මෙතෙක් ධාවනයේ යෙදවීමට නොහැකිව නිෂ්ක්‍රීයව තිබේ. එමෙන්ම නොවැම්බර් මස 7 වැනිදා ගෙන්වන ලද එන්ජිමද මෙතෙක් ධාවනයට යෙදවීමට නොහැකි වී ඇතැයි ද හෙළි වී ඇත. තවත් එන්ජිමක් පීලි පැන අනතුරට ලක් වීම නිසා අලුත්වැඩියා සඳහා යොමු කර ඇත.

දැනට ගෙන්වා ඇති එන්ජින් අටෙන් ධාවනයේ යොදවා ඇත්තේ පහක් පමණි.

කොන්ත්‍රාත් ගිවිසුමේ කොන්දේසි අනුව පළමු එන්ජිම ගෙන්වීමෙන් පසු අඩු තරමින් මාස තුනක්වත් මෙහෙයුම් කටයුතු සිදු කර මතු වන ගැටලු සම්බන්ධයෙන් අවධානය යොමු කර ඇනෙක් එන්ජින් නැව් ගත කර ගැනීමට තිබූ නමුත් අඩුම තරමින් ප්‍රධාන මාන පිළිබඳව හෝ අවධානය යොමු නොකර සෙසු එන්ජින් නැව්ගත කිරීමට අනුමැතිය දීම ගැටලු සහගත බව විගණනයේ දී හෙළි වී තිබේ.

මේ වන විට ධාවනයේ යොදවා ඇති දුම්රිය එන්ජින්වල වම්පස රෝදවලට වඩා දකුණු පස රෝද විෂ්කම්භය වැඩි බව ද එම පරීක්ෂණයෙන් හෙළි වී තිබේ. මෙලෙස රෝදවල විෂ්කම්භය එකිනෙකට වෙනස් වීම නිසා ඒවා නිරන්තරයෙන් විවිධ මට්ටම්වලින් ගෙවීමට ලක් වන අතර ඉන් රේල් පීලිවල ගෙවීමද ඉක්මන් වන බව පරීක්ෂණ වාර්තා වේ හෙළි වී තිබේ.

මෙම එන්ජින් මෙරට දුම්රිය මාර්ගවල ධාවනය සඳහා නුසුදුසු බව ද මෙම පරීක්ෂණ වාර්තාව පෙන්වා දෙයි.